سوپای ئەمریکا بەرەبەیانی ئەمڕۆ چوارشەممە لە ڕووداوێکی بێپێشینەدا هێرشی کردە سەر دوو کەشتیی حکومەتی ئێران، ئەمەش وەک وەڵامدانەوە و تۆڵەسەندنەوەیەک بەرامبەر ئەو هێرشانەی تاران کردوویەتیە سەر کەشتیییە بازرگانییەکان لە گەرووی هورمز.
بەپێی زانیارییەکانی ماڵپەڕی ئاکسیۆس، بەرپرسێکی ئەمریکی ڕایگەیاندووە کە ئەم هەنگاوە بەشێکە لە سیاسەتێکی نوێی سەرۆک ترەمپ بە ناوی "کەشتی بەرامبەر بە تەنکەر"، کە ئامانج لێی ڕێگریکردن و سڵکردنەوەی ئێرانە لە بەئامانجگرتنی ئەو کەشتییانەی لە گەرووی هورمزەوە تێدەپەڕن.
وردەکاریی هێرشەکان:
بەئامانجگرتنی کەشتییەکان: فڕۆکە بێفڕۆکەوانەکانی ئەمریکا موشەکیان ئاڕاستەی ژووری بزوێنەری ئەو دوو کەشتییە حکومییە کردووە کە لە باکووری هێڵی گەمارۆی دەریایی ئەمریکا لەنگەریان گرتبوو.
پێقانی ١٠٠ ئامانج: بەرپرسانی ئێران ئاماژەیان بەوە کردووە کە شەوی ڕابردوو دەوروبەری ١٠٠ ئامانجی جیاواز لە ناوخۆی وڵاتەکە پێکراون.
ئامانجە سەربازییەکان: بەپێی وتەی بەرپرسانی ئەمریکی، هێرشەکان بنکەکانی بەرگری ئاسمانی سوپای پاسداران، سیستەمەکانی ڕادار، تواناکانی دروستکردنی مین، بنکەکانی پەیوەندی، سەکۆکانی موشەکی کروزی دژە کەشتی و سەکۆی درۆنی هێرشبەریان گرتووەتەوە.
شکستی وەڵامدانەوەکەی ئێران:
بەرپرسانی ئەمریکی ئاشکرایان کردووە کە وەڵامدانەوەی سەربازیی ئێران شکستی هێناوە؛ ئێران نزیکەی ٢٥ موشەکی بالیستی تەقاندووە، بەڵام تەنها نیوەیان گەیشتوونەتە ئاسمانی ئوردن. لەو ژمارەیەش ١٠ موشەکیان تێکشکێنراون و سێ دانەشیان بەبێ ئەوەی هیچ زیانێکی گیانییان لێبکەوێتەوە کەوتوونەتە خوارەوە.
وەڵام بدەوه