ڕه‌جه‌ب ته‌یب ئه‌ردۆگان سه‌رۆك كۆماری توركیا ئه‌مڕۆ پێنجشه‌ممه، له وه‌ڵامی هێرشه‌كانی ئیسرائیل بۆ سه‌ر لوبنان و فه‌ڵه‌ستین رایگه‌یاند، ناوچه‌كه به‌ره‌و زریانێكی ئاگرینی مه‌ترسیدار ده‌ڕوات.
ڕه‌جه‌ب ته‌یب ئه‌ردۆگان له میانی كۆنگره‌یه‌كی ڕۆژنامه‌وانیدا له‌گه‌ڵ به‌سێرۆ یۆمای فه‌ی سه‌رۆكی سه‌نیگال رایگه‌یاند، كه ماوه‌ی داهاتو دۆخه‌كه پشێوی زیاتر به‌خۆوه ده‌بینێت.
سه‌رۆك كۆماری توركیا داوای له هه‌مو ئه‌و وڵاتانه كردوه كه "هه‌ستی ویژدان"یان هه‌یه، وه‌ك خۆی ده‌ڵێت، "فشاری زیاتر بخه‌نه سه‌ر حكومه‌تی ئیسرائیل بۆ ڕاگرتنی هێرشه‌كانی سه‌ر فه‌ڵه‌ستین و لوبنان.
جه‌ختیشیكرده‌وه، هه‌ڵوێستی سه‌نیگال سه‌باره‌ت به پرسی فه‌ڵه‌ستین كه له‌سه‌ر بنه‌مای چاره‌سه‌ری دو ده‌وڵه‌تی دامه‌زراوه، "زۆر به‌نرخه" و ده‌شڵێت، "ئێمه هه‌ڵوێستی پته‌وی برا ئه‌فریقییه‌كانمان په‌یڕه‌و ده‌كه‌ین، كه تێده‌گه‌ن سته‌م و شه‌ڕ و كۆمه‌ڵكوژی مانای چییه، دژی سیاسه‌ته جینۆسایدییه‌كانی ئیسرائیل".
وەڵام بدەوه