ئەمریکا زەنگی لێیدا

میدیای ئەمریکا دەڵێت، بەرپرسانی واشنتن وڵاتانی کەنداویان ئاگادارکردووەتەوە، خۆیان بۆ هێرشێکی چڕ و کورت بۆ سەر ئێران ئامادە بکەن. ڕۆژنامەی وۆڵ ستریت جۆرناڵ بڵاوی کردووەتەوە، ئەمریکا هۆشداری و ئاگاداری داوەتە چەند وڵاتێکی کەنداو کە خۆیان ئامادە بکەن بۆ ئەگەری هەڵمەتێکی سەربازیی کورت و چڕ بۆ سەر ئێران، دوای هەڵبژاردنی نیوەخوولی ئەمریکا کە هەفتەی داهاتوو بەڕێوەدەچێت. ڕۆژنامەکە ڕوونی کردووەتەوە، هێزەکانی ئەمریکا سەرقاڵی بەهێزکردنی سیستەمی بەرگریی مووشەکی، پڕکردنەوەی کۆگاکانی تەقەمەنی و ئامادەکردنی فڕۆکە جەنگییەکانن بۆ هەر هێرشێکی چاوەڕوانکراو.سەرچاوەکانیش بە ڕۆژنامەکەیان وتووە، دۆناڵد ترەمپ مەیلی بۆ ئەنجامدانی هێرشێکی گەورە هەیە کە ژێرخانی ئابووری و بنکە ئەتۆمییەکانی ئێران بکاتە ئامانج، بەڵام هێشتا بڕیاری کۆتایی نەداوە.بەگوێرەی ڕۆژنامەکە، ئیسرائیلیش لای خۆیەوە ئامادەکاری بۆ دەستپێکردنەوەی هێرشە سەربازییەکانی بۆ سەر ئێران دەکات.