نامەیەکی کراوە بۆ کاک قوباد تالەبانی
وەک کوردێک داوایەکم لێت هەیە، چیتر بافێلی برا گەورەت لە یارییە سیاسییەکانت بەکار نەهێنی و نەیکەیە پەردەی شاردنەوەی نیەت و ئامانجە سیاسییەکانت. هەموو کەس دەزانن بافێلی برات نەخۆشە و ئەو دەرمانە نەفرەتییە، تەواو داگیری کردووە و لە پێشوازی کردن و دانیشتنی لەگەڵ سەرۆک کۆماری ئێران بە تەواوییەوە پێیەوە دیار بوو، لە چ دۆخێکی خراپ دایە و چۆنە پەرێشانە بەدەست ئەو دەردەوە.
کاک قوباد گوناحە هەمان چیڕۆکی باوکی خوا لێخۆشبووت لەگەڵ برا گەورەکەشت دووبارە بکەیەوە، ئەوتان بۆ یەکلایی کردنەوەی زۆر ململانێ ناوخۆییەکانی ناو یەکێتی و لێدان و دەرپەڕاندنی ژمارەیەکی زۆری سەرکردەکانتان بەکارهێنا. بافێلی براشت بۆ دەرکردنی ئامۆزەکانتان بەکارهێنا، ئێستاش وەک کەسێکی توڕە و بێ کۆنتڕۆل هەر ڕۆژە و بەلاییەکییەوە دەنێی و هەموو ڕێکەوتنە گوماناوی و ژێربەژێرەکانی لەگەڵ حەشدی شەعبی و پەکەکە بە براکەت ئەنجام دەدەی، تا ڕۆژ بە ڕۆژ لەلای خەڵکی کوردستان ناشیرینتر و ناپەسندتر بێت، خۆشت وەک بەرزەکی بانان بۆ دەربچی و وەک پیاو چاک خۆت بناسێنی.
ئەگەر زەڕەییەک خۆشەویستیت بەرامبەر بە براکەت لە دڵ دایە، بیبە نەخۆشخانەیەکی تایبەت با چارە بکرێت و لەوە وێرانتر نەبێت. ئەگەر زگت بەویش ناسوتێ بیرێک لە منداڵەکانی بکەوە با چیتر باوکیان بەو شێوەیە نەبین و تەنها ئەو وێنانەی باوکیان تا هەتایە لە یادگەیان بمێنێتەوە و ئازاریان بدات.
حسیبە سعید گەردی
۱۳ـی ئەیلولی ۲۰۲٤
وەڵام بدەوه