دوایین هەڵبژاردنی كەركووك

دوایین هەڵبژاردنی ئەنجومەنی پارێزگای كەركووك كە ڕۆژی 18/كانوونی یەكەم/2023، هاوكات لەگەڵ 14 پارێزگای عەرەبنشینی عیراقدا بەڕێوە چوو، چەند دەرەنجامێكی پێ گوتین:
یەك: یەكەمین جارە ژمارەی دەنگدەری عەرەب لەگەڵ ژمارەی دەنگدەری كورد لە پارێزگاكەدا، مەبەستمان ئەوانەیە كە دەنگیان دا، نزیك بە یەكسان دەبێت. ئەمەش زەنگی هەڕەشەیەكی زۆر گەورەیە بۆ ناسنامەی كەركووك.
دوو: كورد بە پەرتەوازەیی چووە نێو هەڵبژاردنەوە، بەمە نەیتوانی ئەو سەركەوتنە بەدەست بهێنێت، كە چاوەڕوانی بوو.
سێ: لە ئەنجومەنی پێشووی كەركووكدا كورد (لیستی برایەتیی كەركووك) سەرووی 60%ی ئەندامانی ئەنجومەنەكەی پێك دەهێنا، لەم هەڵبژاردنەدا ئەندامانی كورد لە ئەنجومەنەكەدا بۆ نزیكەی 45% دابەزیوە. ئەمەش ئاماژەیەكی نەرێنییە بۆ دابەزینی سەنگی كورد لە ئەنجومەنەكەدا.
چوار: تا دێت ژمارەی عەرەب بە دوو شێواز لە پارێزگاكەدا زیاد دەبێت، لە لایەك بەردەوام لە عەرەبستانی عیراقەوە عەرەب بەرەو كەركووك دێن و تێیدا نیشتەجێ دەبن، لە لایەكی دیكەوە ڕێژەی زاوزێ و زیاد بوونی عەرەب بەرزە و هی كورد كەمە. ئەمەش سەرەنجام وا دەكات ڕێژەی عەرەب بەرەو ژوور بچێت تا ئەوەی دەبن بە زۆرینەی دانیشتووانی پارێزگاكە.
پێنج: لە ئاهەنگ و خۆ نواندن و خۆشی بە بۆنەی هەڵبژاردنەوە، كورد ناڕێكی و بێ سەوروبەریی نواند، عەرەب و توركمان ڕێك و پوخت ئاهەنگیان دەگێڕا.
شەش: لیستەكانی عەرەب گوتار و قسەیان بە ئاراستەی هاندانی هاووڵاتیان بوو بۆ دەنگدان، لیستەكانی كورد خەریكی یەكتر شكاندن و سەنگەر گۆڕینەوەی ئەم و ئەو بوون.
حەوت: هەردوو شەوی 18/19 و شەوی 19/20ی كانوونی یەكەم/2023 تەقەیەكی زۆر كرا، بێ سەروبەرییەكی زۆر لەم ڕووەوە لە شاردا بە گشتی بەدی كرا.
هەشت: عەرەب بە پلان و نەخشەوە لیست و قەوارەی بۆ هەڵبژاردن پێكەوە نا، كورد كەمتر ئەمەی كرد.
نۆ: بەشێكی زۆر لە كورد دڵگەرمانە بۆ دەنگدان چوون، عەرەب یەك پارچە بەرەو دەنگدان چوون.
دە: بەشێكی زۆر لە كورد بۆ دەنگدان نەچوون، بە دەگمەن عەرەب و توركمان بۆ دەنگدان نەچوون.
ئەمانە هەموو سەرنجی مەیدانین، هی ئەوەن بە وردی لێكۆڵینەوەیان لە بارەوە بكرێت، كار بۆ چارەسەر كردنیان بكرێت.