وەک بڵێی هەنگیان لە کونی دارا دۆزیبێتەوە ڕاستوچەپ پەلاماری سەرۆکی حکومەتی هەرێم ئەدەن و گشت سنوورێکیان بەزاندووە.
جارێک ئەڵێن ئاڵا پارچە پەڕۆیەکە و هیچ نیە، جارێک ئەڵێن کوا ئاڵای کوردستان بۆ دانەنراوە!
کە لەوە تەواو بوون و مەستی رووی تێکردن، ئینجا دێن خۆیان دەکەن بە پسپۆرو شارەزای ئەتیکەت و پاشای دیپلۆماسی و ژەنەراڵی سیاست و سیاسەتبازی و رەخنە لە شێوازی دانیشتن دەگرن و پەلاماری ئاسمان و ریسمان دەدەن و دەست و زمان لە هیچ ناپارێزن
کە لەوەش تەواو بوون و هیچیان بە هیچ نەکرد، ئینجا دێن لەشکەرێک بێکارو بێ عارو گەجەروگوجەری بن دیوارو بکەرە شاراوەکانی بن دیواری دونیای سۆشیال مێدیای ئاراستەکراو بەر دەدەنە گیانی حکومەت و لە هەموو لایەکەوە هێرش دەکەنە سەری و بە قێزەوەنترین شێواز دەیکوتنەوە و پەنا دەبەنە بەر نزمترین وشەو دەستەواژەی ناشرین و نەگونجاوە.
هیچ گومانی تێدانیە بکەرانی ئەسلی و شاراوەی ئەم هەلاو بەزمەی سۆشیال میدیا، کۆمەڵە کەسانێکی رووخاوو دۆڕاوو تۆڕهەڵدراوی پەراوێزخراوی پانتای سیاسەتێکن، لە گشت جوانی و بەرپرسیارەتیەک داماڵدراوە.
ئەمان کەسانێکن کۆشکی درۆینەیان لە شووشەیە، کەچی بەرد دەگرنە ماڵی خەڵک و شەرم لە هیچ ناکەن.
ئەمان تۆزقاڵێک نە خەمی نەتەوەو نیشتیمانیانەو نە رۆژێک لە رۆژان لە ئاست بەرپرسسیارەتیە مێژووییەکاندا بوونەو بە تەنگ خێروچاکەی گشتی و بەرژەوەندی گەل و نەتەوەوە بوونە.
وەڵام بدەوه