ئێران مەرجی قورسی راگەیاند

​سەرچاوەیەکی ئاگاداری ئێرانی ڕایدەگەیەنێت، لێکتێگەیشتنی نێوان تاران و مەسقەت سەبارەت بە گەرووی هورمز بە واتای کردنەوەی گەرووەکە نایەت و تا ئەمریکا حەوت مەرجی سەرەکی جێبەجێ نەکات، بە داخراوی دەمێنێتەوە.
​ئەمڕۆ شەممە، 12ـی ئەیلوولی 2026، سەرچاوەیەکی نزیک لە تیمی دانوستانکاری ئێران بە ئاژانسی تەسنیمی ڕاگەیاندووە، لە کۆتایی مانگی ئابی ڕابردوودا و دوای چەندین گەڕی گفتوگۆی چڕ، تاران و مەسقەت گەیشتوونەتە ڕێککەوتنێک بۆ دەستنیشانکردنی ڕێڕەوی نوێی چوونەژوورەوە و دەرچوون لە گەرووی هورمزدا.
​سەرچاوەکە ئاشکرای کردووە، بڕیارە لە چەند ڕۆژی داهاتوودا بە ئامادەبوونی وەزیرانی دەرەوەی وڵاتانی کەنداو و عێراق، ناوەڕۆکی ڕێککەوتنەکە و نەخشەی ڕێڕەوەکە ڕابگەیەندرێت، بەڵام ئەو وڵاتانە تەنیا بۆ ئاگاداربوون بەشدار دەبن و بڕیارەکان تەنیا لە نێوان تاران و عوماندا یەکلا کراونەتەوە.
​بەپێی زانیارییەکان، سەرجەم ڕێڕەوی چوونەژوورەوەی کەشتییەکان بۆ ناو کەنداو و بەشێک لە ڕێڕەوی دەرچوونیان، بە تەواوی دەکەونە ناو سنووری ئاوە هەرێمییەکانی ئێران و لە ژێر چاودێری و پڕۆتۆکۆڵە ئەمنییەکانی تاراندا دەبن.
 هەروەها ئەو ڕێڕەوە باشوورییەی ئەمریکا پێداگری لەسەر کردنەوەی دەکرد، بە تەواوی دادەخرێت.
​لە کۆتاییدا، سەرچاوە ئێرانییەکە هۆشداریی داوە کە ئەم ڕێککەوتنە بە مانای دەستپێکردنەوەی هاتوچۆی کەشتیوانی نایەت، چونکە ئێران لە ڕێگەی نێوەندگیرەکانەوە حەوت مەرجی داوەتە ئەمریکا، و کردنەوەی گەرووەکە بە تەواوی بەستراوەتەوە بە جێبەجێکردنی ئەو مەرجانە لەلایەن واشنتنەوە.