پارتێکی سیاسی بەیاننامەکی دەرکرد لە بارەی کاراکردی پەرلەمان

بەیاننامە
لەبارەی تێپەڕبوونی دوو ساڵ بەسەر ناکارابوونی پەرلەمانی کوردستاندا
بەناوی خوای بەخشندە و میهرەبان
 جەماوەری سەربەرزی کوردستان..
 لایەنە سیاسییەکان و دامەزراوە پەیوەندیدارەکان..
لە کاتێکدا دوو ساڵ بەسەر ناکارابوونی پەرلەمانی کوردستاندا تێدەپەڕێت، بە ئەرکێکی نیشتمانی و ئەخلاقی دەزانین نیگەرانیی قووڵی خۆمان لە بەردەوامبوونی ئەم دۆخە نەخوازراوە دەرببڕین. ناکارابوونی سەرەکیترین دامەزراوەی شەرعیی هەرێم، کاریگەریی ڕاستەوخۆ و نەرێنی لەسەر پرۆسەی سیاسی، داڕشتنی یاساکان، چاودێریکردنی دەسەڵاتی جێبەجێکردن و پاراستنی ماف و بەرژەوەندییە بنەڕەتییەکانی هاووڵاتیان دروستکردووە.
پەرلەمانی کوردستان، وەک بەرزترین دامەزراوەی یاسادانان و نوێنەری ئیرادەی ڕاستەقینەی خەڵکی کوردستان، پایەیەکی سەرەکیی سیستمی دیموکراسی و دامەزراوەیی هەرێمەکەمانە. بەردەوامبوونی پەکی کەوتنی ئەم دامەزراوەیە، بۆشاییەکی مەترسیداری لە یاسادانان و چاودێریدا دروستکردووە و بووەتە ئاستەنگ لە بەردەم چارەسەرکردنی کێشە نیشتمانی و نەتەوەییەکان.
هاووڵاتیانی خۆشەویست..
لە ماوەی دوو ساڵی ڕابردوودا، خەڵکی کوردستان ڕووبەڕووی کۆمەڵێک تەنگژەی سەختی ئابووری، دارایی و خزمەتگوزاری بوونەتەوە. لە نێوەندی ئەم کێشانەدا، بوونی پەرلەمانێکی کارا و چاودێر پێویستییەکی حەتمییە بۆ ئەوەی بێتە داڕێژەر و بەرگریکار لە دەنگ و داواکارییە ڕەواکانی خەڵک.
ئێمە لێرەوە جەخت دەکەینەوە:
 خەڵکی کوردستان نابێت زیاتر لەوە باجی ناکۆکی و ملمڵانێ سیاسییەکان بدەن.
 بەرژەوەندیی گشتی و بەرگریکردن لە گوزەرانی هاووڵاتیان دەبێت لە سەرووی هەموو بەرژەوەندییە حزبی و سیاسییە کاتییەکانەوە بێت.
داواکاری و هەڵوێست
لەبەر ڕۆشنایی ئەم واقیعەدا، داوا لە هەموو لایەنە پەیوەندیدارەکان دەکەین:
1. بەرپرسیارییەتیی نیشتمانی هەڵبگرن و بە ڕوحیەتی بەکۆمەڵ کار بکەن.
2. هەنگاوی جددی و خێرا بنێن بۆ کاراکردنەوەی پەرلەمانی کوردستان.
3. ڕۆڵی یاسایی و چاودێریی ئەم دامەزراوەیە بگێڕنەوە تا بێتەوە شوێنی بڕیارە چارەنووسسازەکان.
هەروەها داوا لە سەرجەم پەرلەمانتارە بەڕێزەکان دەکەین ئەرکی یاسایی خۆیان جێبەجێ بکن و هەوڵی جددی بدەن بۆ دەستپێکردنەوەی دانیشتنەکانی پەرلەمان و کردنەوەی دەرگای پەرلەمان بە ڕووی خەڵکی کوردستاندا، تاوەکو مافەکانیان پارێزراو بێت.
کاراکردنەوەی پەرلەمان تەنها خواستێکی سیاسی نییە، بەڵکو مافێکی بنەڕەتیی خەڵک و پێویستییەکی نیشتمانییە بۆ پاراستنی دیموکراسی، سەقامگیری و بونیادنانی ئایندەیەکی شایستە بۆ هەرێمی کوردستان
سەربەرزی بۆ گەلی کوردستان
          منی نبی قهوەچی 
سەرۆکی فراکسیونی پارتی چاکسازی تورکمان
        لە پەرلەمانی کوردستان