فڕۆەکەی جەنگی نێردرا بۆ ڕۆژهەڵاتی ناوەراست

ئەمڕۆ سێشەم 20ی ئۆکتۆبەر، وەزارەتی بەرگریی بەریتانیا بڕیاری دا فڕۆکە جەنگییەکانی جۆری تایفۆن ڕەوانەی ڕۆژهەڵاتی ناوەڕاست بکات بۆ جێبەجێکردنی ئەرکی بەرگری بەسەر ئاسمانی سعوودیەدا، ئەمەش وەک پاڵپشتییەک بۆ ڕووبەڕووبوونەوەی هێرشی حووسییەکان و پاراستنی ژێرخانی ئەو وڵاتە.
وەزارەتی بەرگریی بەریتانیا ڕای گەیاند کە فڕۆکە جەنگییەکان ئۆپراسیۆنی بەرگریی ئاسمانی جێبەجێ دەکەن کە ئامانج لێی پاراستنی شارەکانی سعوودیە، هاووڵاتییانی مەدەنی و ژێرخانی نیشتمانیی گرنگە لە هێرشە ئاسمانییەکان، دووپاتیشی کردەوە کە فڕۆکەکان هیچ هێرشێک ناکەنە سەر حووسییەکان.
ڕۆژنامەی تایمزی بەریتانی بڵاوی کردەوە، ئەو فڕۆکە جەنگییانەی لە قەتەر جێگیر کراون، بۆ جێبەجێکردنی ئەرکەکانیان بەسەر ئاسمانی سعوودیەدا دەفڕن، بە مەبەستی تێکشکاندنی ئەو مووشەک و فڕۆکە بێفڕۆکەوانانەی حووسییەکان کە ئاراستەی ئەو وڵاتە دەکرێن
ڕۆژنامەکە لە زاری سەرچاوەیەکی بەرگرییەوە گواستییەوە و زیاتر گوتی، فڕۆکە بەریتانییەکان هەوڵ دەدەن هەر تەنێکی ئاسمانیی دوژمنکارانە بخەنە خوارەوە کە بەرەو سعوودیە دەڕوات.
هەروەها ڕوونی کردەوە کە تیمە بەریتانییەکان ڕاستەوخۆ بەشداری لە فڕینە بەرگرییەکان دەکەن بۆ پاراستنی ئاسمانی سعوودیە، لەبری ئەوەی تەنیا یارمەتی فڕۆکە سعوودییەکان بدەن لە بەردەوامیدان بە ئۆپراسیۆنەکانیان.