په‌رله‌مانی عێراق رێگه نادات په‌یامنێرانی هه‌واڵه ئاژانسییه‌كان بچنه نێو باڵه‌خانه‌ی په‌رله‌مانه‌وه و، ته‌نها رێگه به ژماره‌یه‌كی كه‌می رۆژنامه‌نووسان ده‌درێت رووماڵی دانیشتنه‌كه‌ی ئه‌مڕۆی په‌رله‌مان بكه‌ن.
ئه‌مڕۆ پێنجشه‌ممه (13ـی تشرینی یه‌كه‌م/ئۆكتۆبه‌ری 2022)، له بڕیارێكی چاوه‌ڕواننه‌كراودا و به‌هۆی هه‌ستیاری دانیشتنی ئه‌مڕۆی په‌رله‌مانی عێراقه‌وه، به‌ڕێوه‌به‌رایه‌تی په‌رله‌مان بڕیاریانداوه رێگه‌نه‌ده‌ن په‌یامنێرانی هه‌واڵه ئاژانسییه‌كان بچنه نێو باڵه‌خانه‌ی په‌رله‌مانه‌وه و ته‌نها رێگه به ژماره‌یه‌كی سنوورداری رۆژنامه‌نووسان ده‌درێت رووماڵی دانیشتنه‌كه بكه‌ن.
بڕیاره ئه‌مڕۆ پێنجشه‌ممه (13ـی تشرینی یه‌كه‌م/ئۆكتۆبه‌ری 2022)، په‌رله‌مانی عێراق به مه‌به‌ستی هه‌ڵبژاردنی سه‌رۆككۆمار كۆببێته‌وه و هێزه ئه‌منییه‌كانی عێراق بۆ رێگریكردن له هه‌ر جموجۆڵێكی نه‌خوازراو و خۆپیشاندانی خه‌ڵك، رێگای هه‌شت به‌رزه‌پردیان له به‌غدای پایته‌خت به ئاراسته‌ی ناوچه‌ی سه‌وز به كۆنكرێت و هێزی ئه‌منی داخستووه‌ن
به‌پێی زانیارییه‌كان هه‌ریه‌كه له پردی كۆماری، سنه‌ك، شه‌هیدان، ئازادی، باب موعه‌زه‌م، موعه‌له‌ق، یاریگای نێوده‌وڵةتی شه‌عب، تالیبیه و رێگای قادسیه به‌ئاراسته‌ی گۆڕه‌پانی نسوور داخستوون.
دەستەی سەرۆکایەتی پەرلەمانی عێراق رایگەیاندووە، ئەمڕۆ ئەنجومەنی نوێنەران بۆ هەڵبژاردنی سەرۆککۆمار کۆدەبێتەوە.
هه‌ر یه‌ك له فراكسیۆنی ئیشراق كانوون و ئیمتیداد رایده‌گه‌یه‌نن، نابنه به‌شێك له پرۆسه‌ی هه‌ڵبژاردنی سه‌رۆك كۆمار و بایكۆتی دانیشتنی ئه‌مڕۆی په‌رله‌مانی عێراق ده‌كه‌ن.
فراكسیۆنی ئشراقه كانوون رایگەیاندووە، به‌شداری له‌دانیشتنی په‌رله‌ماندا ناكه‌ن و وه‌كو ئۆپۆزسیۆنی كارا ده‌بینه چاودێر به‌سه‌ر ده‌سه‌ڵاته‌كانی عێراقه‌وه.
له‌لایه‌كی دیكه فراكسیۆنی بزووتنه‌وه‌ی ئیمتیداد ئاماژەی بەوەکردووە، به‌شداری له دانیشتنی تایبه‌ت به هه‌ڵبژاردنی سه‌رۆك كۆمار ناكه‌ن كه بڕیاره ئه‌مڕۆ به‌ڕێوه بچێت
وەڵام بدەوه