ئەمریکا و ئێران لە دەوحە کۆدەبنەوە

هاوکات لەگەڵ ڕاپۆرتەکان سەبارەت بە بەردەوامیی دانوستانەکانی نوێنەرانی ئێران و نێوەندگیرانی قەتەر لە دەوحە بۆ گەیشتن بە ڕێککەوتنێک لەسەر دەستپێکردنەوەی دانوستانە ڕاستەوخۆکان لەگەڵ ئەمریکا، ڕاپۆرتەکان ئاماژە بەوە دەکەن کە شاندێکی ئەمریکیش پەیوەندی بەم گفتوگۆیانەوە دەکات.
ڕۆژنامەی قەتەری "عەرەبی جەدید" لە زاری سەرچاوەکانی نزیک لە نێوەندگیرەکانەوە، باسی لە پێشکەوتنی دانوستانەکان کردووە و ڕایگەیاندووە، شاندێکی ئەمریکیش بۆ مەبەستی دانوستانی ڕاستەوخۆ لەگەڵ ئێران دەچێتە دەوحە.
 ئەم هەواڵە دوای گفتوگۆیەکی 12 کاتژمێریی نێوان نێوەندگیرە قەتەرییەکان و بەرپرسانی ئێران و هەروەها ڕاپۆرتی ماڵپەڕی ئەکسیۆس سەبارەت بە بەردەوامیی ئەم دانوستانانە لە دەوحە بڵاودەبێتەوە. پێشتریش ئەوە ڕاگەیێنرابوو تیمی دانوستانکاری ئێرانی لە گەشتی گەڕانەوەی نێوەندگیرە قەتەرییەکاندا، لەگەڵ ئەواندا هاوسەفەر دەبن بۆ دەوحە.