مەشقی چەکی ئەتۆمی کرا

وەزارەتەکانی بەرگریی فەڕەنسا و بەریتانیا ڕایانگەیاند، بۆ یەکەم جار لە مێژوودا فڕۆکە جەنگییەکانی هەردوو وڵات بەشدارییان لە مەشقێکی هاوبەشی ئاسمانیدا کردووە بۆ ئەنجامدانی هێرشی ئەتۆمی، ئەم هەنگاوەش لە چوارچێوەی بەهێزکردنی توانای بەرپەرچدانەوەی ئەتۆمیی هاوبەشی نێوان پاریس و لەندەندایە
ئەمڕۆ هەینی، 23ی تشرینی یەکەمی 2026، لە ڕاگەیەندراوێکی هاوبەشی هەردوو وەزارەتی بەرگریی بەریتانیا و فەڕەنسادا کە ئاژانسی "فرانس پرێس" بڵاوی کردووەتەوە هاتووە، ئەم مەشقە سەربازییە هاوبەشە ئێوارەی ڕۆژی سێشەممەی ڕابردوو بە سەرکەوتوویی جێبەجێ کراوە.
بەگوێرەی ڕاگەیەندراوەکە، فڕۆکە جەنگییەکانی جۆری "ڕافال"ـی فەڕەنسی دوای فڕینیان لە بنکەی ئاسمانیی "سانت دیزییە" لە باکووری ڕۆژهەڵاتی فەڕەنسا، بە یاوەریی فڕۆکە جەنگییەکانی هێزی ئاسمانیی شاهانەی بەریتانیا، پرۆسەی هاوشێوەکاریی وەشاندنی گورزێکی ئەتۆمیی ئاسمانییان ئەنجام داوە.