ترەمپ هۆشداری بە ئێران دەدات

ترەمپ هۆشداری بە ئيران دەدات دەستبەجێ کوشتنی خەڵک ڕابگرە. دۆناڵد ترەمپ، سەرۆکی ئەمریکا ڕایدەگەیێنێت کە ئێران مووچەی بەشێکی زۆری سەربازەکانی نادات و قەیرانێکی گەورەی مرۆیی لەو وڵاتە دروست بووە کە دەبێت دەستبەجێ ڕابگیرێت.
دۆناڵد ترەمپ، لە پەیامێکدا هێرشی تووندی کردە سەر دەسەڵاتدارانی تاران و ڕایگەیاند: کۆماری ئیسلامیی ئێران کە بەرەو شکست و ڕووخان دەچێت، مووچەی بەشێکی زۆری سەربازەکانی نادات.
 ترەمپ لە پەیامەکەیدا ئاماژەی بەوەش کردووە، هاوکات لەگەڵ نەدانی مووچەی هێزەکانیان، دەسەڵاتدارانی ئێران لە هەمان کاتدا خۆپیشاندەران دەکوژن، تەنانەت لەو کاتانەشدا کە خەڵک خۆپیشاندانیش ناکەن، ئەمەش لە ئاستێکدایە کە پێشتر هاوشێوەی نەبینراوە.
سەرۆکی ئەمریکا دۆخەکەی بە قەیرانێکی مرۆیی گەورە و بێوێنە وەسف کردووە و جەختی لەوە کردووەتەوە کە دەبێت دەستبەجێ ئەمە ڕابگیرێت.