میدیای فەرمی کۆریای باکوور بڵاویکردەوە، کیم جۆنگ ئون سەرۆکی کۆریای باکوور، فەرمانی بە سوپا و پیشەسازی تەقەمەنی و چەکی ئەتۆمی کردووە، ئامادەکارییەکان بۆ شەڕ خێراتر بکەن بۆ بەرپەرچدانەوەی ئەو هەنگاوانەی کە بە هەنگاوی شەڕانگێزی ئەمریکا وەسفی کردووە.
ئەمڕۆ پێنجشەممە، میدیای فەرمی کۆریای باکوور رایگەیاند، کیم جۆن ئون، لە کۆبوونەوەی پارتی دەسەڵاتداردا سەبارەت بە ئاراستە سیاسییەکانی ساڵی نوێ قسەی کرد، گوتی: پیۆنگ یانگ هاوکاری ستراتیژی خۆی لەگەڵ وڵاتانی سەربەخۆ و دژە ئیمپریالیزم، فراوانتر دەکات.
ئاژانسی هەواڵی ناوەندی کۆریای باکوور ئاشکرایکرد، "کیم، ئەرکی شەڕی بۆ سوپا و پیشەسازی تەقەمەنی و چەکی ئەتۆمی و کەرتەکانی بەرگری شارستانی داناوە، بە مەبەستی خێراکردنی زیاتری ئامادەکارییەکانی جەنگ".
کۆریای باکوور کاردەکات بۆ فراوانکردنی پەیوەندییەکانی لەگەڵ وڵاتان، لەنێویاندا رووسیا، واشنتنیش پیۆنگ یانگ تۆمەتبار دەکات بەوەی کەرەستەی سەربازیی بۆ مۆسکۆ دابینکردووە، کە لە شەڕی ئۆکرانیادا بەکاریدەهێنێت، هاوکات رووسیا پاڵپشتی تەکنیکی پێشکەش دەکات بۆ ئەوەی یارمەتی کۆریای باکوور بدات بۆ پەرەپێدانی توانا سەربازییەکانی.
باس لەوەشکراوە، کە کیم لە کۆبوونەوەکەدا ئامانجی ئابووریشی بۆ ساڵی نوێ داناوە، کە بە ساڵێکی گرنگ بۆ گەیشتن بە پلانی گەشەپێدانی پێنج ساڵەی وڵاتەکەی وەسفکردووە.
کۆریای باکوور لە ماوەی دەیان ساڵی رابردوودا تووشی کەمی خۆراک بووەتەوە، هەروەها شارەزایانی نێودەوڵەتی هۆشدارییان دا کە داخستنی سنوورەکان لە کاتی پەتای کۆڤید-19 بووەتە هۆی تێکچوونی ئاسایشی خۆراک.
بەپێی خەمڵاندنەکان بەرهەمهێنانی بەروبووم لە کۆریای باکوور لە ساڵی 2023دا، زیادیکردووە بەهۆی بارودۆخی کەشوهەوای لەبارەوە. بەڵام بەرپرسێکی سیئۆل رایگەیاندووە، ئەو بڕە هێشتا زۆر کەمترە لەوەی کە پێویستە بۆ چارەسەرکردنی کەمیی خۆراکی درێژخایەنی وڵاتەکە.
وەڵام بدەوه