حکومەتی هەرێمی کوردستان هەڵقوڵاوی ناخی کۆمەڵگاو دەسکەوتی زیاتر لە نیوسەدە خەبات و تێکۆشان و بەرهەمی دەریایەک خوێنی شەهیدانی رێگەی رزگاری و ئازادیە.
حکومەتی هەرێمی کوردستان مۆرکی کوردستانێکی ئازادە، ئازاد لە تەوق و زنجیری دیلی و سەرکزی و بەرکرێگیراوی. سەربەست لە پاشاگەردانی و خۆبەکەمزانین و دوور لە ئەلقە لە گوێی و خۆبەدەستەوەدان.
حکومەتی هەرێمی کوردستان هێمای یەکگرتوویی نەتەوەیی و شوناسی کوردستانێکی ئازادو دابڕاوە لە پرۆکسێ بوون و سەربەخۆیە لە رووی هێزوتواناوەو پشت ئەستوورە بە هێزوبازووی گەلەوە.
حکومەتی هەرێمی کوردستان ئایکۆنی نوێنەرایەتی کردنی سەرجەم چینوتوێژەکانی گەلە و یەکەیەکی دەستەجەمعی ئیداری و نمونەی جوانی پێکەوە کارکردن و هەرەوەزی کاری سیاسی کوردستانیانە.
لێ بەداخەوە دوو لەو هێزانەی بەردەوام لە رێگەی هەوڵە شاراوەکانیانەوە تەقەلایانە حکومەتی هەرێم لە پەلوپۆ بخەن و شکۆی لێ وەرگرنەوەو شوناسەکەی لەکەدار بکەن و سیمایەکی ناشرینی پێ ببەخشن، لە نێو هەناوی کۆمەڵگای کوردی هەڵتۆقیون.
یەکێتی نیشتیمانی کوردستان و پارتی کرێکارانی کوردستان ئەو دوو هێزەی بە درووشمە باقو بریقەدارەکانیانەوە ساڵانێکە کۆمەڵانی خەڵکی کوردستان لە خشتەدەبەن و خەریکی چەواشەکاری و نانەوەی دووبەرەکین و خەونی بێ ناوەرۆکی گەورەیان بۆ دەبینن و دڵەراوکێ و ترس و دۆخی نامتمانەیی بەرهەم دێنن، بەردەوامن لەسەر ئاستەنگ دروست کردن بۆ حکومەتی هەرێم.
ئاستەنگ نانەوە و سەرئێشە دروست کردن بۆ کاروپرۆژەکانی حکومەتی هەرێم لە لایەن ئەم دوو هێزەو گرووپ و تاقمە سێبەرەکانی سەربەم دوو هێزە، لە ساڵانی رابردوودا جێی تێڕامان و هەڵوەستە لەسەرکردن بووە.
ئاستەنگ دروست کردنی هێزەشاراوەکانی سەربەم دوو حزبە لە پاڵ ئەوقەیرانانەی بەرۆکی حکومەتی هەرێمی گرتووە، دۆخێکی سەخت و هەلومەرجێکی نەشیاوو نەگونجاوی بۆ حکومەت و گوزەرانی هاوڵاتیان هێناوەتە ئاراوە.
ئەم دۆخە وایکردووە حکومەت نەتوانێ بە شێوەیەکی کارا بپرژێتە سەر کاروچالاکیەکانی و خزمەتێکی شایستە بە سەرجەم چینوتوێژەکانی کۆمەڵگاوە بکات.
هێزە ئیقلیمیەکان هەرکاتێ خواستی فشارهێنانیان هەبێ بۆ سەر حکومەتی هەرێم و دامودەزگا شەرعیەکان و بیانەوێ ئەجیندای دەرەکی و بەرژەوەندیەکانیان سەربخەن و پەرەی پێ بدەن، یەکێتی و پ.ک.ک وەک دوو هێزی دەستەمۆکراوو دەسکەڵاو ئامرازی بەرخۆرو پیسخۆری لە پێشدا ئامادەکراو بەگژ حکومەتدا دەکەن و دۆخی هەرێم و حکومەتی پێ ئاڵۆز دەکەن.
ئاڵۆزبوونی دۆخی حکومەتی هەرێمیش ئاڵۆزبوونی دۆخی ژیان و گوزەرانی هاونیشتیمانیانی لێدەکەوێتەو دواجار ئەبێتە کەرەسەی هێرش و پەلاماردان و هاندانی هاونیشتیمانیان دژبە حکومەتی هەرێم بە گشتی و لەبارچوونی برواو متمانەی هاوڵاتیان بەرامبەر بە حکومەت و سوکایەتی کردن بە پیرۆزی و رەمزە نیشتیمانی و نەتەوەییەکانەوە.
وەڵام بدەوه