لە دونیای کامیۆنیکەیشن و پەیوەندی کردن و ئاڵۆگۆڕی زانیاری، بوونی میدیایەکی بەهێزوکارا زامنی سەرکەوتنی گەیاندنی بەرنامەو پلان و ریفۆرم و پەیام و درووشم و ڕاوبۆچوونەکانە.
دوای شۆڕشی زانیاریەکان و لەدایک بوونی ئامێرو کەرەسەکانی پەیوەندی کردن و تەوژمی تەکنۆلۆجیا، جیهانی پەیوەندیەکان گۆڕانکاریەکی ریشەیی و بەرچاوی بەخۆیەوە بینی و ژیانی مرۆڤ پێی نایە قۆناغێکی هەستیارترو جیاوازتر لە رابردووەوە.
شۆڕشی تەکنۆلۆجیا لە چەشنی تسۆنامیەکی بەهێزی ریفۆرم لە چاوترووکانێکدا سەرلەبەری ژیان و رووبەری کاروچالاکیە رۆژانەییەکانی مرۆڤی تەنیەوەو ریفۆرمێکی ریشەیی و گۆڕانکاریەکی رادیکاڵی بەسەر کۆی گشتی تێگەیشتنەکانی مرۆڤدا هێنا.
ئەم گۆڕانکاریانە هەم زەمینەی پەیوەندی کردنی مرۆڤی بە دەورووبەرەو ئاسان کرد و هەم توانی گرینگترین پەیام و نوێترین گۆڕانکاری لە ماوەیەکی زەمەنی زۆر کورتدا بە خێرایی بە گوێگران و بینەرانیەوە بگەیەنێ.
گومان لەوەدانیە یەکێک لە شەرتومەرجە سەرەکیەکانی سەرکەوتنی هەر کاراکتەرێکی سیاسی و بکەرێکی کۆمەڵایەتی و چالاکی کۆمەڵگا لە بواری ئیدارە و حکومەت و بەڕێوەبردن و سەرکردایەتی کردندا، بوونی میدیایەکی بەهێزە وەک کەناڵ و کەرەسەیەکی پەیوەندی پێوەکردن.
ئەم میدیابەهێزە ئەشێ کەناڵێکی تەلەفزیۆنی، ماڵپەرێکی ئەلەکترۆنی، پەیجەکانی تۆڕە کۆمەڵایەتیەکان، بەرنامەیەکی راستەوخۆی وتاردان و گێڕانی سمینار، پرۆگرامێکی رادیویی، پەیامێکی ڤیدیۆیی یا پەیوەندی کردنی ڕاستەوخۆی کاربەدەستێک بێت بە دونیای دەرەوەیەوە.
پەیامی میدیایی بەهێز هەڵگری چەندین خەسڵەتێکی نکۆڵی لێ نەکراوە، لەوانە:
⁃ هەڵگری ناوەرۆکێکی بەهێزە
⁃ کورت و پوختە
⁃ ناوەرۆکێکی رونی هەیە
⁃ ئاراستەکەی دیارە
⁃ ئامانجدارە
⁃ تایبەتە بە پرسێکی دیاری کراو یا رووداوێکی کتوپڕی کۆمەڵگاوە
⁃ شوێنی تەفسیرات و لێکدانەوەی تیانیە
⁃ تەمومژاوی و لێڵ نیە
⁃ رون و ئاشکرایە
⁃ تایبەتە کراوە بەیەک پرس
⁃ خاوەنی رەهەندێکی دیاریکراوە
⁃ کۆتایی پێ هێنەری مقۆمقۆیە
⁃ بە زمانێکی سادەو پاراو نووسراوەتەوە
⁃ لە هەرچی دەستەواژەی قورس و قابیلی تەفسیرو راڤەکاریە پاک کراوەتەوە.
⁃ بۆ گوێگرو وەرگر نووسراوەتەوە نەک بۆ خودی نووسەر
⁃ بۆ پۆزلێدان نیە، بەڵکو بۆ قەناعەت پێ کردن و سەلماندنی حەقیقەتە
⁃ هەڵگری ناواخن و مەغزایەکی دیاریکراوی میدیاییە
⁃ هەڵگری دەقێکی سادەی ئەدەبیە
لە دونیای پێشکەوتوودا ئامادەیی میدیایەکی بەهێزو کارا بە کۆڵەگەی بنەڕەتی سەرکەوتنی حکومەتەکان وێنادەکرێ.
ئەم کۆڵەگەیە ئەرکی قەناعەت پێکردن و گەیاندنی پەیامی ڕاستەقینەی حکومەت و دەسەڵاتدارانی وڵاتە، نەک لێڵ کردنی دۆخی کۆمەڵگاو دروست کردنی گومان و دڕدۆنگی و لەبار بردنی دڵنیایی و بەگژدایەک کردنی چینوتوێژەکانی کۆمەڵگا.
وەک تێبینی کراوە بەرپرسانی میدیایی کابینەی نۆ لەوەتەی دەست بەکار بووە بەهۆی نائامادەیی میدیایەکی بەهێزو کاراو هۆشیارو دەست پێشخەرەوە، بەداخەوە نەیتوانیوە بەرنامە و پلان و پەیامی ڕاستەقینەی حکومەت و دامودەزگاکانی بە شێوەیەکی کارا و ویستی حکومەتەوە بخاتە بەردەم کۆمەڵگاوەو حەقیقەتەکان وەک خۆی بگەیەنێ.
ئەم ناکاراییە بەداخەوە ئەم رەهەندە نەرێنیانەی لێکەوتۆتەوە:
- کاریگەری دروست نەکردن و ئاراستەکردنی رای گشتی بە قازانجی حکومەت.
⁃ دروست نەکردنی رای گشتی لە ئانوساتە هەستیارەکاندا
میدیای ناکارا لە چەشنی بکەرێکی ناکارای رووبەری کۆمەڵگا، ئەشێ ببێتە هۆکاری ئاڵۆزی و گەیاندنی پەیامی نارۆشن و نارون و بڵاوکردنەوەی زیاتری دڕدۆنگی و هەستیارکردنی دۆخی نامتمانەیی و نەهێشتنی برواومتمانە لە نێوان حکومەت و هاوڵاتیاندا.
لە حاڵەتێکی نەخوازراوی لەم چەشنەدا ئەگەرێکی بەهێز خۆی دەسەپێنێ. ئەویش لەباربردنی متمانەی نێوان کۆمەڵگاو حکومەتە و دواجار بەردەوامبوونی ئەمجۆرە دۆخە، ئەشێ رووبەروو بوونەوەی نێوان چینوتوێژەکانی جڤاکی بەدوادابێ و ئاڵۆزی و پشێوی بێتە کایەوە.
وەڵام بدەوه