سەرباری بەخشینی هەزاران شەهید و قوربانی و ماڵوێرانیەوە، کوردی باشور نەیتوانیوە قۆناغەکانی پەرتەوازەیی و هەڵوەشانەوەی یەکریزی ببڕێ و بپەرێتەوە بۆ قۆناغێکی باڵاترو واڵاترو کاڵای دەسکەوتەکان بە قەد باڵای قوربانیەکان ببڕێ و بیکاتە بەر نیشتیمانەوە.
بە بچووکترین هەڵوەستە کردن لەسەر واقعی سیاسی هەرێمی کوردستان چەندین حەقیقەتت بۆ دەردەکەوێ.
بەرچاوترین حەقیقەتی ئەم واقعە، ئامادەیی دوو دونیابینی و روئیای نەتەوەیی و نیشتیمانی بووە. یەکیان بۆ سەرخستنی پرۆژەی دەوڵەتسازی هەوڵیداوە، ئەوەی تریان بۆ بە لۆکاڵی هێشتنەوەو بچووک کردنەوەی لەناو چوار چێوەیەکی تەسکی جوگرافیدا.
هەر لە بنەڕەتەوە ئەم دوو روانگەیە دەرهاوێشتەی پرۆسەیەکی سیاسین، بە درێژایی سەت ساڵی رابردوو چەندین قۆناغی پڕلەو هەورازو نشێوی بڕیوەو بکەرانی ناو پرۆسەکە سەر بە دوو جەمسەری هێزەوە بوونە.
جەمسەرێک هەڵگری بونیادنانی کیان و دەوڵەتی نەتەوەیی بووە و ئەوەیتریان هەوڵی بۆ مانەوەی داوە لە ناو سنوورو جوگرافیای دەوڵەتێکی بە زۆر بەیەکەوە لکێندراو بە ناوی عێراقەوە.
مێژووی نکۆڵی لێکردن و هێشتنەوەی دۆزی کورد لە ناو بۆتەی جوگرافیای سیاسی عێراق پێمان دەڵێت، بکەران و دەسەڵاتدارانی ناوەندی هێز لە لایەک و هێزەناوەخۆییە کوردەکە لە لایەکی تر، بەردەوام گەورەترین کۆسپ و ئاستەنگ و لەمپەری بەردەم جوولانەوەی رزگاریخوازی کوردی باشور بوونە.
هەربۆیەش دوای ئەم هەموو ساڵە ئێستاشی لەگەڵدابێ، هێزە پەڕگێرە ناوەخۆییە کوردەکان لەپاڵ زۆرینەی عەرەبی دەمارگیر، نەیانهێشتووە کوردی باشور ئاسوودەیی بەخۆیەوە ببینێ و بە لانی کەمی داخوازی و خواست و ئامانجە نەتەوەییەکانیەوە بگات.
وەڵام بدەوه