موچەی فیدڕاڵی

موچەی فیدڕاڵی
سیاستەکانی بەغدا هەنگاو بە هەنگاو بە جدی سەرقاڵی بەتاڵ کردنەوەی سیحری سیستەمی فیدڕاڵین لەو عێراقەی کورد دەستوورەکەی وەک زامنی یەکپارچەیی ئەم نیشتیمانە وێناکردووە. 
نووسینەوەی دەستووری فیدڕاڵی دوای چەندین گەڕی دانوستان و گفتوگۆی چڕوپڕەوە لە قۆناغێکی زۆر خوێناوی جەنگی شیعەو سونەی عێراقی لەدایک بوو. 
دۆخی نووسینەوەی دەستوور کەوتبووە ژێر کاریگەری ئاڵۆزترین قۆناغەکانی دوای رووخانی بەعس. 
سەرکردەکانی کورد و شارەزایانی بواری یاساو دوستوور ئەوپەڕی هەوڵی خۆیان لە پێناو نووسینەوەی دەستوورێک دا، زامنکاری مافی کوردو گرووپە ئەتنیکیەکانی تری عێراق بێت. 
کورد هیوا خوازبوو لە ريگەی نووسینەوەی دەستوورێکی نیشتیمانی و مۆدێرن بتوانێ ماف و ئەرکەکانی لە چوارچێوەی سیستەمێکی بەهێزی فیدڕاڵیەوە زامن بکات و قۆناغەکانی دیکتاتۆری و تائیفی و ستەمکاری تێپەڕێنێ. 
بەڵام بەداخەوە دوای بیست وسێ  ساڵ لە ڕمانی بەعس،  وادەردەکەوێ سیاسیەکانی بەغدا هێشتا نەیانتوانیوە یا نەیانویستووە سەردەمانی کۆن و زەمەنی حوکمی شمولی تێپەڕێنن و تادێت زیاتر لە رێگەی فشارو تەنگ پێ هەڵچنین و بینەوبەردەی موچەو کارتی ئابوری و داراییەوە سیستەمی فیدڕاڵی لە ماناو مەفهوم بەتاڵ کەنەوە و زیاتر لە جاران هەرێمی کوردستان بخەنە ناو مەنگەنەی داواکاریە ناکۆتاکانیانەوە. 
ئومێد دەکرێ ئەم حکومەتە تازەیە ئەزمون لە رابردوو وەرگرێ و چیتر بە هێشتنەوەی دۆخەکە وەک خۆی و مامەڵەی ناشایست و دژە دەستوور لەگەڵ هەرێم، نەبێتە بارگرانی بەسەر هەرێم و هاوڵاتیان و لەمەزیاتر چەمکی هاوڵاتیبوون و فیدڕاڵیزم کرچ و کاڵ و بێ ناوەرۆک بێ بەهاو بێ مەغزا نەکاتەوە.