هەڕەشەی ناوەخۆ و دەرەکی بۆتەوە.
هەروەک تێبینی کراوە لەوەتەی کابینەی نۆ دامەزراوە رۆژ نیە نەیارانی هەرێم لە گرووپە تیرۆریستیەکانەوە بگرە تا هێزو تاقم و دەستە و گرووپگەڵی ناو هەناوی هەرێم و دەستی تێکدەری دەرەکی، کێشەو ئاستەنگ و کۆسپ نەخەنە بەردەم حکومەتەوە.
لە زۆر پرسی پەیوەندیدار بە دۆخی ئێستای هەرێمی کوردستانەوە ئەو چین و توێژانەی سەردەمانێک خۆیان بە دڵسۆزانی قەوارەی هەرێم و رەخنەگرو چاکەکارەوە لە قەڵەم ئەدا، هەر لە چرکە ساتی دەست بەکار بوونی ئەم کابینەیەوە کەوتنە سەنگەر گرتن لە حکومەتەوە.
ئەم سەنگەر گرتنە لە زۆر حاڵەتدا بە ئاراستەی دانانی هێمای پرسیار لە سەر کۆی گشتی سیستەمی سیاسی و دامەزراوە حکومیەکانی هەرێم و پەکخستنی هەوڵ و کۆششەکانی حکومەتەوە پەلی هاویشت بەرەو ختوکەدانی هەستی هاونیشتیمانیانەوە دژ بە حکومەت.
ئەم هەوڵەش بە پلەی یەکەم خۆی لە دروست کردنی ئاستەنگی جۆراوجۆر لەبەردەم حکومەت و خاوکردنەوەی پرۆسەی سیاسی و ریفۆرم و لەباربردنی یەکریزی نێوان گەل و هەڵوەشاندنەوەی سەرلەبەری دامەزراوە یاساییەکانی هەرێمەوە دەبینیەوە.
هەڵبەت کاراکتەرەکانی پشت ئەم تەوژمە هێشتا بەردەوامن لەسەر نەهجی خراپ و نەرێنیان و جارێ لە پەلەپۆ نەکەوتوونە و فوودەکەنە بچوکترین خواری و خێچی و گلەییەک بۆ ختوکەدانی گەل بە ئامانجی بە گژداچوونەوەی حکومەت و سەرلەبەری دامەزراوە یاساییەکانی هەرێمەوە.
بکەرانی پشت پەردەی ئەم تەوژمە تەماویە هەر هۆکارێک و لایەنێک هاندەریان بێت، دواجار بێ سێو دوو ئاو دەکەنە ئاشی نەیارانی یەکریزی کورد و هەوڵدان بۆ هەڵوەشاندنەوەی قەوارەی سیاسی هەرێم و لەباربردنی ئاشتی کۆمەڵایەتی و هێنانە کایەی ترسو دڵەرواکێ و دۆخی نادڵنیایی و نانەوەی ئاڵۆزی و سەرگەردانیەوە.
وەڵام بدەوه