دوای پرۆسەی ئازادی عێراق و تەنانەت تا ئەم چرکەساتەش رۆڵی بارزانی لە کێشمەکێش و بینەوبەردە سیاسیەکانی گۆڕەپانی سیاسی عێراق، رۆڵێکی یەکلاکەرەوەو نکۆڵی لێ نەکراو بووە.
ئێستاشی لەگەڵدابێ لایەنە سیاسی و تائیفیەکانی ناوەند بە مەبەستی کردنەوەی گرێ کوێرەکان و بووژاندنەوەی ژیلەمۆی هیواو سەرخستنی پرۆسەی سیاسی و گەیشتن بە چارەسەرەکان، هەر دەگەڕێنەوە لای بارزانی.
بارزانی وەک خاڵی یەکلاکەرەوەو سەنتەری راوێژ و بڕیارگەلی تایبەت بە خاوکردنەوەی دۆخی چەقبەستووی سیاسی و لێک نزیک کردنەوەی لایەنە بەرژەوەندخوازە پێک ناکۆکەکانی نێو پرۆسەی سیاسی، هەمیشە لە روانگەی چاکەی گشتیدارۆڵێکی ئەرێنی و باش و بەرهەمداری نواندووەو توانیویەتی سەنگ و قورسایی خۆی بۆ گشت لایەنە سیاسیەکانی گۆڕەپانی سیاسیەوە بسەلمێنێ.
لێ لە پاڵ ئەمەشدا لەوەتەی بارزانی تێکەڵ بە دونیای سیاسەت و کاری سیاسیەوە بووە، بە دەست گرتن و خۆ تەیار کردن بە پارادایمێکی تەواو نەتەوەیی و نیشتیمانیەوە هەوڵی سەرخستن و مسۆگەرکردن و بە یاسایی کردن و بە دەستووری کردنی داوا رەواکانی کوردی داوەو ئەوپەڕی هەوڵ و تێکۆشان و توانای دیپلۆماسی و مەعنەوی خۆی خستۆتەگەڕەوە.
بارزانی سەلماندوویەتی گوتاری ئەو گوتارێکی تەواو ناسیۆنالیستی لیبراڵیستی بەرحەقی بە یاسایی و دەستووری کردنی پرسی کوردە لە چوارچێوەی عێراقێکی یەکگرتووی فیدراڵدا کە تیایدا کورد هەست بە کەرامەت و بوون و گەورەیی و مسۆگەربوونی مافەکانیەوە بکات و پاشگەزبوونەوەشی تیادا نەبێت.
لەمەش زیاتر بارزانی سەلماندوویەتی بە یەکگرتوویی مانەوەی دەوڵەتی عێراق و ئینتیما بۆ ئەم دەوڵەتە لە لایەن هەرێمی کوردستانەوە، بەندە بە چەسپاندنی مافە دەستوری و یاساییەکانی هەرێم بەگشتی و بەرقەرار کردن و پیادەکردنی شەراکەتێکی راستەقینەی سیاسی و ئابوری و دەستوریەوە دوور لە فرت و فێڵ و خۆ دزینەوە لە لایەن کاربەدەست و لایەنە عێراقیەکانی ناوەندەوە.
وەڵام بدەوه