دیاردەی چەکداری و چەک هەڵگرتنی بێ مۆڵەت و بەدەر لە یاسا بە گشتی هەمیشە هەڵگری حەزێکی شاراوەیە بۆ دوورکەوتنەوە لە گفتوگۆو و ئارگومێنت گۆڕینەوەو فەرزکردنی مەیلی خۆسەپاندن و دروست کردنی جۆرێک لە کەڵەگایی.
لە دۆخی کۆمەڵگایەکی نائارام و پڕ لە پشێوی و گرژی و جەمسەربەندنی نێوان هێزو پێکهاتە کۆمەڵایەتیە پێک ناکۆکەکان و قەیراناویدا، هەڵگرتنی چەکی بێ مۆڵەت و بەدەر لە یاسا وەک گەورەترین کێشەو گرفتی بەردەم چەسپاندنی یاسا و گێڕانەوەی ئۆقرەیی بۆ کۆمەڵگا دەژمێردرێت.
لەم جۆرە کۆمەڵگایانەدا هێزی یاسا و سەردارکردنی قانون و چەسپاندنی مادە و بەندەکانی یاسا، بەردەوام رووبەرووی ئاڵنگاری و گرفتی گەورە دەبنەوە.
نەبوونی هۆشیاری یاسایی و بەرپرسیارەتی ئایینی و ئەخلاقی و ویژدان لەو کۆمەڵگایانەی گیرۆدەی تەنگژەو قەیران و دۆخی سیاسی ناجێگردان،حکومەت و دەسەڵاتی یاسا لە بەردەوام ئەخرێنە بەردەم تاقیکردنەوەی مێژووییدا.
بۆیە گرینگە حکومەت و لایەنە پەیوەندیدارەکان چ ئەوانەی لە بواری یاسا کار دەکەن و چ ئەوانەیشی لە بوارەکانی کۆمەڵایەتی و پەروەردەوە شارەزان، هاوتەریب بە ئاڕاستەی دروست کردنی هۆشیاری یاسایی و ئەخلاقی و جڤاکیەوە هەوڵی بنەبڕکردنی دیاردە نەشازو قێزەوەنە ناشارستانیەکان بدەن و لە بەربەست دانان لەبەردەم دیاردەی چەک هەڵگرتن لە هیچ رێگریەک نەسڵەمێننەوە و کۆڵ نەدەن.
هەر سستی و شلی و خاویەک لە جێ بەجێ کردنی بڕیارەکانی حکومەت، دواجار دەبێتە هۆکاری کەڵەکەبوونی کێشەوگرفتەکان و تۆخ بوونەوەی دۆخی نالەباری کۆمەڵگاوە.
وەڵام بدەوه