لەرووی سایکۆلۆژیاوە ھەر کەشێک بە فیتنەو مەترسی و گومان و دوودڵی و بێ بروایی و دڵەراوکێوە تەنرابێ، بێ سێ و دوو بەشێک لە پێکھاتەو چین و توێژو تاکەکانی سەرقاڵی نانەوەی ناکۆکی و دووبەرەکی و فتنەگێڕی و دڕدۆنگی و ملشکاندنی یەکترو بەرھەمھێنانی دونیایەکی ناتەندروست و نائارام و ئاڵۆزەوە دەبن.
لەمجۆرە کەشەدا، فیتنەگێڕەکان لە رووی جەمسەربەندی و بەرژەوەندی و ئایدیۆلۆژیاوە دابەشی سەر جەمسەرە پێک ناکۆکەکان دەبنەوەو لە ناو خودێکی خۆکردە و کۆمەڵێک بەھاو نەریت و نۆرمی بەرھەم ھێنراوی ئان و سات و پرۆسە ناجۆرەکاندا دەتوێنەوە.
سەردانیکردنی لاهور جەنگی بۆ لای پ ک ک و کۆبوونەوە شاراوەکانی هەڵگری ئەجیندایەکی ترسناکە بە ئاراستەی تێکدانی دۆخی هەرێم و لەبار بردنی هەوڵەکانی لایەنە سیاسیەکان بۆ گەڵاڵەکردنی جۆرێک لە یەکریزی لەم دۆخە هەستیارەی هاونیشتیمانیان و هەرێم پێیدا تێدەپەڕن.
ئاڵۆزکردنی بارودۆخی پیشخابور بە فیتی لاهور و هاندانی هێزە بەکرێگیراوەکانی پ.ک . ک و دەست لە پشت دانی لاووگەنجی دەڤەرەکە بۆ نانەوەی ئاژاوەو ئاڵۆزکردنی دۆخەکە، پێشهاتێکی ترسناک و شوێن هەڵوەستەلەسەر کردنە.
پ.ک.ک لەوەتەی دامەزراوە گۆڕانکاریەکی ریشەیی بەسەر ئەجینداو ئایدیۆلۆژیا و ئامانج و درووشمەکانیدا هاتووەو هەر جارەو کۆمەڵێک پاشەکشەی بەرچاو دەکات لە درووشمە باق و بریقەدارەکانیەوە.
ئەم هێزە بەردەوامە لەسەر لەخشتەبردن و ختوکەدانی هەستی نەتەوەیی توێژی لاوو گەنجان و ئاراستەکردنی کێرڤی نارەزایی ئەو توێژە بەرەو نانەوەی ئاشوب و فتنەو ئاڵۆزکردنی زیاتری دۆخی هەرێم.
ئەم هەوڵە نزۆک و ئامانجدارەی لاهور وەک باقی هەوڵە تێکدەرەکانی تری لە حاڵێکدایە، هەردوو ئامۆزاکانی بە تەواوەتی دەستیان بەسەر داهات و خاڵە سنووریەکانی ژێر دەسەڵاتی یەکێتیدا گرتووەو لاهور جەنگیان لە گشت حیسابات و هاوکێشەیەکی سیاسی، ستراتیژی، خێزانی، ئابوری و داهاتووی یەکێتی دەرکردووە.
گەرەکە گەنجان و لاوانی کوردستان زیاتر لە هەموو کات هەست بە مەترسی دۆخەکە بکەن و خوێندنەوەیان بۆ فیتنەگێڕیەکانی لایەنە بەکرێگیراوەکانی ئیقلیمی هەبێ و دان بە خۆیانا بگرن و نەکەونە داوی ترسناکی ئەم هێزە فشۆڵە بەزیوانەی، لەوەتەی هەن جگە لە شکست و پاشەکشە و ماڵوێرانی، هیچ دەسکەوتێکی تریان نەخستۆتە نێو هەنبانە بۆرینەیان و هیچ جۆرە شانازیەکی تریان تۆمار نەکردووەو شکۆیەکیان نەچنیوەتەوە.
وەڵام بدەوه