فرەیی لە کۆمەڵگای فرە ئایدیادا

پلۆراڵیزم و فرەیی لەهەر کۆمەڵگایەک یەکێک لە هێماونیشانەکانی دیموکراسیە. 

لەهەموو کۆمەڵگا مرۆییەکان حزبەکان نوێنەرایەتی ئایدیا و ئایدیۆلۆجیای تاکەکانی کۆمەڵگا دەکەن. 

زۆربوونی ئایدیاو فرەیی، هێمایە بۆ زیندووێتی جڤاک و گەشەی فکرو پێشکەوتنی کۆمەڵگا. 

لەکۆمەڵگا فرە ئایدیاکاندا حزبەکان وەک نوێنەری  بیروبۆچوون و ئایدیۆلۆجیا جیاوازەکان لە رێگەی یاساو دەستوورەوە بواری ئەنجامدانی کارو چالاکی سیاسی و کۆکردنەوەی زۆرترین جەماوەریان  لە دەور فکرو ئایدیۆلۆجیایان بۆ فەراهەم دەکرێ. 

لەم جۆرە جڤاکانەدا حزب و لایەنە سیاسی و رێکخراوەکانی کۆمەڵگای مەدەنی لە پاڵ پاراستنی بەرژەوەندی و  گەشەپێدانی بنکە جەماوەریەکانیان، پابەندی پاراستنی یاساو دەستوورو عورف و ئاسایشی کۆمەڵایەتی و نیشتیمانین. 

لادان لە بنەما دیموکراسیەکان و نانەوەی ئاڵۆزی و گرژی سیاسی و پەیرەوکردنی گوتاری پەرتکەر، یەکسانە بە تێکدانی ئاسایشی نیشتیمانی و گشتیەوە. 

حزبەکان لەمجۆرە جڤاکانەدا وێڕای پابەندە یاسایی و دەستووریەکان، نابێت بە هیچ شێوەیەک مەترسی بخەنە سەر پیرۆزیەکانی کۆمەڵگاو بە برۆوبیانووی بێ بنەماوە دۆخی هاوڵاتیان و نیشتیمان بەرەو ئاڵۆزی و نامتمانەییەوە بەرن.