پەتای جنێوفرۆشی

پەتای جنێوفرۆشی
جنێودان و بێ ڕێزی کردن بەرامبەر بە کۆی پیرۆزیەکانی کۆمەڵگا یەکێکە لەو دیاردە دزێوانەی لەگەڵ لە دایک بوونی سۆشیال مێدیا زیاترو بە تەوژمێکی گەورەترەوە هاتە ناو دونیای مرۆڤەکان و  بە خێراییەکی زۆر سەرسووڕهێنەرەوە رووبەری کۆمەڵگاکانی داگیرکرد. 
ئەگەر جاران و بەر لە لەدایکبوونی سۆشیال مێدیا قسەی پرووپوچ و جنێوی سوک و دەمشڕی هیچوپووچەکان تەنیا لە سوچێکی چایەخانەیەکدا بیسترابێ، ئێستاکە هەمان وشەی ناشرین و جنێودان و دەمشڕی بێ سانسۆر و هیچ پێچ و پەناو فیلتەرێک دەخرێتە سەر رووپەری پەیج و پانتای سۆشیال مێدیاو بێ لێپرسینەوە سیمای کۆمەڵگای پێ ناشرین و  ناخی تاکەکانی پێ بۆگەن و ژەهراوی دەکرێ. 
مرۆڤ بە مانای تەواوی مرۆڤبوون بەدەر لەهەموو پەیوەست بوونێکی ئایدیۆلۆجیاو ئایین و ئاڕاستەی سیاسی، بەرپرسیارەتیێکی ئەخلاقی و جڤاکی لەسەر شانە بەرامبەر بە کۆمەڵگاو سەرلەبەری رەگەزە پێک هێنەرەکانیەوە. جنێوفرۆشی و گاڵتەجاڕی تەنیا پیشەی ئەوانەیە خوویان بە هەزەلیبوونەوە گرتووەو لەهەموو بەهایەکی جوان و ئایینی و  ئاسمانی و خواپەسەندانە داماڵدراون.