قوربانی کردن 

قوربانی کردن 
وشەی قوربانی هەڵگری مانای “ نزیکایەتی” یا “ نزیکەکان”  یا “ خزمو کەس” ە لە زمانی عەرەبیدا.  قوربانی کەرەسە و ئامرازێکە بۆ نزیک بوونەوە و بڕینی مەودایەکی دیاریکراو بۆ نزیک بوونەوە لە پەروەردگارەوە. 
قوربانی بە مانا فەلسەفیە ئەبستراکتەکەی واتا دوور کەوتنەوە لە “ من” ەکان و  “ هی منەکان” و بەخشینی ئەوەی خاوەندارێتیەکەی بۆ ئێمەیە و ئێمە خاوەنین، بە ئەوانی ترەوە لە پێناو ئامانجێکی باڵادا.  
مرۆڤ هەرگیز قۆناغەکانی “ باش بوون” و مەودای نێوان “ خێرومەندی”  و “ لوتکەی باڵابوون” نابڕێ گەر بێتوو ئەوەی  بەڕاستی خۆشی دەوێ و هی خۆیەتی نەبەخشێتە ئەوانیتر و ئەوەی بۆ خۆی دەیهەوێ بۆ “ کۆ” ش  نەیهەوێ. 
ماهیەتی قوربانی کردن فۆرم بەخشین نیە بە کردەیەکی دیاریکراوی باوی ئایینی یا کۆمەڵایەتی یا نەریتی، بەڵکو تێپەڕاندنی دۆخی خۆویستی و خودئەڤینیەکی وشک و خۆپەرەستی و تێپەڕاندنی خود و ژێر پێ خستنی خواست و ویستە زاتیەکانی خودە لە پێناو ئامانجێکی باڵاو پیرۆزدا.
قوربانی کردن بە دیوە رۆحانیەکەیەوە رووخاندنی پانتاو دیواری نێوان خودێکی بەرژەوەندخوازو و خۆپەرەست و زێدەخوازیەکانی خودی مرۆڤە لە پێناو نزیک بوونەوە لە ئارمانج و مەرامێکی بڵندو پیرۆزو مەعنەویدا. 
قوربانی کردن هەرگیز ناچێتە خانەی  دووڕوویی و وێناکردنێکی نمایشی بۆ دەست خستنی چەند دەسکەوتێکی کاتی و دونیایی و ناوو ناوبانگ دەرکردن و خۆ فەرزکردن و  سینگ دەرپەڕاندنەوە.