هەڵمەتی بە شێعە کردنی ناوچە کوردستانیەکانی دەرەوەی سنوری ئیداری هەرێم دەستی پێ کردووە

حەشدی شەعبی لە هەوڵی ئەوەدایە دەسەلاتی خۆی لە سنووری شەنگال زیاد بکات و باڵادەستی خۆی و شیعەگەرایەتی لەو سنوورە فراوان تر بکات، بەمەش بە بریاری سەرۆکی ئەرکانی دەستەی حەشدی شەعی بە ناوی "ابو فدک " و لە ژێر چاودێری راستەوخۆی "فالع فەیاز"ی سەرۆکی دەستەی حەشدی شەعبی چەندین بریارییان دەرکردووە.
 سەرەتا پلانەکەیان بەوە دەست پێکردووە لە رێگەی کرینی سەدان دۆنم زەوی کشتووکاڵی لە خەڵکی ئەو ناوچەیە بە پارەیەکی زۆر، لەکاتی کرینی زەوییەکانیش گرێبستیان لە نێوان خاوەن زەوییەکان و نوێنەری حەشد نووسیوە و لە دادگاش کارەکانی بۆ تەواو کراوە، هەروەها پلانێکی تری حەشدی شەعبی دامەزراندنی هەزاران کەسی ئەو سنوورە بووە بۆ ناو ریزەکانی حەشد بە جۆرێک نیوەی دامەزراوان لە خەڵکی ئێزدی بن و نیوەکەی تر لە کوردی شیعە مەزهەببن، لەلایەکی ترەوە حەشد لە هەوڵی ئەوەدایە هێزە جیاوازەکانی ئێزدی کە لە ناو حەشدان لە چوارچێوەی لیوایەک یەکیان بخاتەوە بەسەر ٤ فەوج دابەشیان بکات کە ژمارەیان سەرویی ٣٠٠٠ سێ هەزار کەس دەبن، بەمەش حەشدی دەیەوێت لە رێگەی ئەو هێزە زۆرەی کە لەو سنوورە هەیەتی دەسەلاتی خۆی لە فەرماندی ئۆپەراسیۆنەکانی نەینەوا  جیا بکاتەوە لە رێگەی "ابو احمد الجباری" وەک فەرماندەییەکی سەربەخۆی ئۆپەراسیۆنەکانی حەشد لە نەینەوا دیاری بکات.
پلانێکی تری حەشد نوێکردنەوەی سێ مەزارگەیە بە ناوەکانی " مام هارون، ذاکر الدین الاعرابی، اولاد علی"  کە هەندێک لە خەڵکی ئەو سنوورە کە لەو مەزارگانەوە نزیکن پێشتر  شیعە مەزهەب بوونە و ئێستا سووننەن  و بەڵام حەشد دەیەوێت خەڵکەکە بگەرێنێتەوە سەر مەزهەبی خۆیان کە شیعن، لەگەڵ دروست کردنی چەند مەزارگەیەکی تر لە 
سنووری شەنگال.