رێ کردن تا دوا وێستگە
لە جیاتی وشەو دەربڕنێکی جوان، بە سەتان وێنەی جۆراوجۆر لە هزرو خەیاڵماندا وێنای جیهان و جوانی و ناشرینیەکانی دەکەین.
ئێمە دەمانەویست هەر لێرەوە، لەم سەکۆیەوە، ئالەم وێستگە هەستیارو ستراتیژیەوە، دونیایەکی جوان و بێ خەوش و شارستانیەتێکی ناوازە و کولتورو تێگەیشتنێکی نوێ دروست بکەین و بۆ نەوەکانی داهاتوو بە میرات بە جێی بهێڵین.
ئێمە لە گۆشەنیگای باوەڕی بەهێزمان بە وێناکردنی دونیایەکی بێ خەوشەوە ئارەزوویەکی قووڵ و گەورەمان هەبوو بە یەقین وەک پاڵپشتیکاری گەیشتن بە خەونەکانمانەوە.
ئێمەی پێشەنگانی مەعریفە و سەری رم و کاروانچیانی رەوتی مێژوو، دەمانەویست لە رێگەی وێناکردنێکی ئێستاتیکی و رازاوەوی پڕلە ئاراستەو رەنگی هەمەجۆرەوە، سنوورەکانی خەون و خەیاڵ و فانتازیاو ئەفسانە ببڕین و جیهانێک بەرهەڤ بکەین، شوێنی هەموومانی تێدا ببایەوە.
ئێمە دەمانەویست سەرباری قووڵایی زەریاکان و پانتای بەرینی زەویەکان و بەرزی کێوەکان و مەترسی هەڵدێرەکان و بەرزی ئاسمان و دووری ئەستێرەکان و ساردوسری شەوانی زستانەکان و تاریکی شەوەکان، روناکی بەرهەم بێنین و دونیایەکی نمونەیی دروست بکەین.
ئێمەی گەریدەکانی نێو رووداوەکانی مێژوو دەمانەویست قسەیەک بکەین دەربارەی چۆنیەتی پەیوەست بوون بە نیشتیمان، گێڕانەوەی ئینتیما بۆ نەتەوەو خاکو جوغرافیا و شکۆی نەژادی کورد. نەک هەر جوغرافیای سیاسی، نەک هەر نیشتیمانی یەک بەشی داگیرکراو، بەڵکو گەڵاڵەکردنی گرێبەستێکی نوێ بۆ دووبارە پەیوەست کردنەوەی رۆح بە نیشتیمانی گەورە و پرسیاری نوێ دەربارەی پرسی نەتەوەو ئازادی و سەربەخۆییەوە.
وەڵام بدەوه