کۆمەڵگای نێودەوڵەتی و هەوڵەکانی چارەسەر

نابێ کورد لە هەموو بوارێک 100% پشت بە رۆژئاواوە ببەستێ. 

مێژوو سەلماندوویەتی بەرژەوەندی ئابوری، ستراتیژی وژیۆسیاسیەکان لە خوێن و مەرگەسات و مەینەتی و ستەمی ستەمکاران گەورەتر، پڕبایەخترو گرینگترن.

قەتیس مانی ھەڵوێستی کەڵەگای ( کۆمەڵگای نێودەوڵەتی) لە بەیاننامەدەرکردن و دەربڕینی نیگەرانیەکان توورێکی قوڕاو ناھێنێ.

ئەو کردارانەی دژبەکوردی ستەملێکراو دەکرێن، تکانی دوا دڵۆپەی ئارەقەی شەرم و شەرمەزاریە بە ناوچەوانی کۆی گشتی ئەو کۆنسێپتە ئەبستراکتە وشک و بێ رۆح و گیانەی ناوی نراوە ( مرۆڤایەتی).

کۆمەڵگای نێودەوڵەتی بەردەوام داوا لە کورد دەکات دان بە خۆیا بنێت و بە گرتنەبەری سیاسەتێکی حەکیمانەو نواندنی نەرمی، لە چوارچێوەی دەوڵەتی عێراقدا بمێنێتەوە و هەوڵەکانی لە پێناوی دۆزینەوەی  چارەسەری کێشەهەڵواسراوەکان و گرتنەبەری رێبازی ئاشتی و پێکەوژیان و تەناهی بخاتە گەڕ. 

لێ هەر ئەم کۆمەڵگا نێودەوڵەتیە هیچ جۆرە فشارێک بۆ دەسەڵاتدارانی  ئێستای فرە جەمسەری عێراق ناخاتەگەڕ،  دان بە مافە دەستوریەکانی کوردا بنێن و چیتر  بەردەوامی بەم دۆخە  ئاڵۆزو  پڕلە دڵەراوکێ و مەترسیە ناخۆشە نەدەن و کێشەکان بە لایەکدا بکەن و ئاسۆیەکی روناک و دڵخۆشکەرو جێی رەزامەندی  هەموو لایەنە سیاسیەکان و عێراقیەکان بێننە کایەوە و  زامنی سەقامگیری سیاسی و ئەمنی وڵات بن.