گفتوگۆی دووقۆڵی و بەرەروو قسەکردن لەگەڵ یەکتر لە چەشنی مێتۆدێک بۆ زیاتر لێک نزیک بوونەوەو لێک حاڵیبوون سەنگی مەحەکی چارەسەر ی زیاد لە نیوەی کێشەوگرفت و لێک حاڵی نەبوونەکانە.
هەمیشە لە دونیای دیپلۆماسیدا بە کراوەیی هێشتنەوەی دەرگای دوان و کەوتنە گفتوگۆ لەگەڵ یەکتر و گوێ گرتن لە رەخنەو گلەیی و گازندەکان، ئاسۆیەکی روناک لەبەردەم دەرفەتەکانی چارەسەر دەخاتە بەردەم لایەنەکانی گفتوگۆکارەوە.
تا لە دەسەڵات نەبیت رەخنەگرتن لە حکومەت و سیستەمی حوکمران سادەترین و ئاسانترین مێتۆدی بەرەنگاەبوونەوەی حوکمە.
جێگەی سەرەنجدانە بەشێکی زۆری ئەم رەخنانەی رۆژانە هاوڵاتیان، رۆژنامەنووسان و ئەندام هەوادارو لایەنگرانی حزبەکان لە رووپەڕی رۆژنامە ئەلەکترۆنی و سۆشیال ميدیاو مێدیای بیستراوو بینراو ئاراستەی حکومەت دەکەن، دەرفەتی ئەوەیان نەهێشتۆتە هەمووان لە پانێلێکی بەرفراوانی گفتوگۆی مەیدانیدا رووبەرووی یەکتر ببنەوەو رەخنەکان و وەڵامەکان لەوێوە ئاراستەی یەکتر بکرێن و جۆرێک لە بەرچاوروونی و ئاسۆی چارەسەر بێتەوە کایەوە.
دیالۆگ بۆ دۆخێکی لەمجۆرەی حاڵی حازری کوردستان یەجگار گرینگە. دەیان هێزو دەستەو تاقمی شاراوەو خزمەتکارانی یەجیندای بێگانە شەووڕۆژ سەرقاڵی نانەوەی دووبەرەکی و فتنەو خۆشکردنی ئاگری بەگژ یەکداکردنی کۆمەڵگان.
دەکرێ شکست پێ هێنانی ئەم هێزو لایەن و تاقمە دەرەکیە بێگانە پەرەستانە لە رێگەی کردنەوەی دەرگای گفتوگۆ لەگەڵ رۆژنامەنووسان و نوێنەرانی چینوتوێژەکانی کۆمەڵگا، بە جۆرێک پەیرەوبکرێ بوار بۆ هیچ جۆرە چەواشەکاری و وتی وتی نەهێڵێتەوەو جۆرێک لە تێگەیشتنی ئەرێنی و بەرهەمداری فرە رەهەندی سیاسی و کۆمەڵایەتیش لە پێناو ئامانجە نەتەوەیی و نیشتیمانیەکان گەڵاڵە بکرێ و ئومێدو هیوا بۆ کۆمەڵگا بگەرێتەوە.
وەڵام بدەوه