ئەگەر تاکێکی بێ مەعریفەی پەروەردەیی و رۆشنبیری جڤاکی و دور لە زانست و زانیاری لە تاکێکی هاوشێوەی خۆی هەڵگەڕێتەوە و بتۆرێ و بە شێوازێکی ناشرین رووبەرووی بێتەوە، هیچ جێی حەپەسان و سەرسووڕمان نیە.
بەڵام ئەگەر هەمان تاکی خاڵی لە مەعریفەو پێشینەی پەروەردەیی جوان و دانسقە لە خەیاڵی خاوو دونیای بێ ئەزمونی خۆیەوە رووبەرووی سەرتاپای کایەی کۆمەڵایەتی و کۆ بێتەوە، گەرەکە هەڵوەستەی لەسەر بکرێ و بە پێشکەش کردنی ڕاڤەیەکی زانستی و وردینی کراوەوە روناکی بخرێتە سەر.
یەکێک خۆی وەک فریادڕەسی کۆمەڵگا وێنا بکات و بە قسەو دەمەتەقەی ناسیاسی و بازاڕی و چەواشەکاریەوە رووبەرووی سیستەمی حوکمرانی و کایە و بکەرانی سیاسی بێتەوەو بە هەلپەرەستیەوە سەرقاڵی قوڕاوکردنی دۆخی سیاسی و گرتنی ماسی گەورە بێت و هیچ سنوورو تەلبەندێکی ئەخلاقی نەناسێ، حەقە ماهیەت و ناواخنی زیاتر بۆ کۆمەڵگا ئاشکرا بکرێت و سنووری بۆ دابنرێ.
دیارە کاتێک تاکێکی یاخی لە وێنای بازرگانێکی چاوچنۆک و پۆپۆلیست و هەلپەرەست، ئەسپی یاخیگەری خۆی تاودەدات و چین و توێژەکانی کۆمەڵگایەکی پڕ لە دڵەراوکێ و ماندوو رووبەرووی یەکتر دەکاتەوە تا دواتر سواری شەپۆلی ناڕەزاییەتیەکان بێت، لە هەموو بەرپرسیارەتیەکی ئەخلاقی و کۆمەڵایەتی داشۆراوە و حەقە سنوورێکی بۆ دابنرێت.
با چیتر بە ناوی ئازادیەوە، ئازادی و مافی سرووشتی و ئینسانی خەڵکانی تر پێشێل نەکات.
وەڵام بدەوه