دۆخە قەیراناویەکان چارەسەرو ئەولەویات

لەهەموو دۆخێکی قەیراناویدا حکومەت دەکەوێتە بەردەم چەندین ئاڵنگاریەوە. 
یا ئەوەتا دەبێت هەموو هەوڵەکانی بۆ دابین کردنی خزمەتگوزاریەکانی ڕۆژانە چڕ بکاتەوە یا دەبێت بە دابین کردنی ئەمنیەت و ئاسایش و پاراستنی سەرووماڵی هاوڵاتیان دۆخێکی ئارام بۆ ژیان مسۆگەر بکات. 

پەیوەست بە هەرێمی کوردستانەوە چەندین ساڵە رەوشێکی قورس هاتۆتە ئاراوە کەوا دەرهاوێشتەوەی دۆخی ناوەخۆی عێراق بە گشتی و قەیرانە یەک لەدوایەکەکانی جەنگی تیرۆر و نەبوونی سەقامگیری و حیساب بۆ نەکردنی کوردە وەک هاوبەشێکی ڕاستەقینەی خاوەن ماف  لەم وڵاتەدا.  

هەلومەرجەکانی ئەم دۆخە هەرێمی کوردستان و دامودەزگاکانی خستۆتە بەردەم چەندین کێشەی  پڕۆکێن و کەڵەکەوەبوو و چارەسەرنەکراوەوە.  

بڕینی موچەو خەرج نەکردنی شایستە داراییەکانی هەرێم لە لایەن بەغداو فشارە بەردەوامەکانی هێزوتەوژمە ئیقلیمیەکان بۆ سەر هەرێم بۆ ملدانی بە فشار و خواستە ئیقلیمیەکان، دۆخێکی تابڵێی سەخت و پڕ لە کێشەی بۆ حکومەت هێناوەتە ئاراوە.  

هەربۆیەش لە بارودۆخێکی ئاوادا  دابین کردنی موچەو  زامن کردنی ئاسایش  و جووڵەی بازرگانی بوونەتە دوو لەو ئەولەویاتە سەرەکیەکانی ئەم کابینەیەو هەوڵدان بۆ چارەسەرکردن و فرەچەشن کردنی سەرچاوەکانی داهات لە سەرووی ئەجینداکانی حکومەت و دامودەزگا پەیوەندیدارەکاندان.