بەشێک لەو مێدیای لە دوای ئازادی عێراقەوە لە منداڵدانی بوویەرو رووداوەکانی رووخانی بەعس و کرانەوەی کوردستان بەرووی دەرەوەو هەژمونی تەکنۆلۆژیاوە لە دایک بوون، ڕۆڵێکی زۆر خراپ و نەرێنیان لە تێکدانی ئاسایشی کۆمەڵایەتی کوردستان و بڵاوکردنەوەی ترس و دڵەراوکێ و نیگەرانی لە داهاتوو گێڕاوە و ئێستاشی لەگەڵدابێ لەسەر هەمان نەهج و بەرنامە و دەستووری نەنووسراوەوە بەردەوامن لە جوڵەو چالاکی.
گەشەی شۆڕشی تەکنۆلۆژیا و هاتنە دونیای سۆشیال مێدیای رەنگاورەنگ و تۆڕە کۆمەڵایەتیەکانی تر، دەرفەتێکی زێڕینی بۆ زۆر کەس و لایەن و تەوژمی سیاسی و جڤاکی رەخساند، بێ سانسۆرو سڵەمینەوە لە یاساو بەرپرسیارەتی ئەخلاقی، چیان ویست بڵاوی بکەنەوە و ئەم رەوتە نێگەتیڤە تا ئێستاش بەردەوامەو نەوەستاوە.
بەشێکی سەرەکی لەو بابەت و هەواڵ و دەقانەی بڵاویشی دەکەنەوە بمانەوێ و نەمانەوێ پەیوەندی ڕاستەوخۆ و ناڕاستەوخۆی بە ئاسایشی کۆمەڵایەتیەوە هەیە.
ئەمان وەک ئەوەی هەنگوێنیان لە کونەدارا دۆزیبێتەوە، دژایەتی کردنی سەرلەبەری حکومەت و دامودەزگا ڕەسمیەکانی بە ئەرکی خۆیان دەزانن.
دەرەنجامی ئەم شێوازی کارکردنەش شتێک نیە جگە لە ئاڵۆزی کۆمەڵایەتی و بەگژیەکداکردنی چینوتوێژە کۆمەڵایەتی و سیاسیەکان و دروست کردنی جەمسەربەندی جڤاکی.
بڵاوکردنەوەی هەواڵی بێ بنەما، تۆمەت بەشینەوە، جنێوفرۆشی، تۆمەتی خیانەت و خستنە پاڵی بێ بنەما، ئیدیعای درۆ، درۆسازی و درۆکردن بە دەم خەڵکانی ترەوەو…هتد بەشێکن لەو نەهجەی مێدیای نابەرپرسیار و دژەئارامی و بەکرێگیراو، بە سوود وەرگرتن لە کەشی ئازادی و دیموکراسی و دوورلە بەرپرسیارەتی یاسایی، جڤاکی و ئەخلاقیەوە پێڕەوی کردووەو بەداخەوە ئێستاشی لەگەڵدابێ بەردەوامە.
وەڵام بدەوه