هەموو جیهان بە ئاڵنگاریەکانی گۆڕانی کەشوهەواو لافاوو کەمبوونی دانەوێڵە و وشکەساڵی و ئەگەری قاتوقڕیەوە سەرقاڵە.
رۆژنامەنووسان، مێدیاکاران و دەزگاو دامەزراوە زەبەلاحەکانی راگەیاندن و ناوەندەکانی توێژینەوەو لێکۆڵینەوەی زانستی و رێکخراوەکانی ژینگەپارێزی و ئاشتی سەوز Green Peace و…سەرقاڵی ڕاڤەو هەڵسەنگاندن و بەراوردکاری و توێژینەوەو لێدانی زەنگی خەتەر و تاوتوێی ئەگەرە ترسناکەکانی دۆخی ئاسایشی خۆراک و گۆڕانی کەشوهەوان لەسەرانسەری جیهاندا، کەچی لای ئێمە مێشیش میوانمان نیە.!!!
درێژەکێشانی جەنگی ماڵوێرانکاری روسیەو وشکەساڵی و بەرزبوونەوەی خێرای پلەکانی گەرماو زەوی و کەمبارانی، جیهان و مرۆڤایەتیان خستۆتە بەردەم داهاتوویەکی نادیارو ترسناک و ئەگەرومەگەری زۆر خەتەرناکەوە.
رۆژ نیە شارەزایانی ئەم بوارانە هۆشداری نەدەن و دەسەڵاتدار و بڕیاربەدەست و سەرمایەدارانی جیهان و خاوەن کۆمپانیا زەبەلاحەکان نەخەنە بەردەم وەڵامی پرسیارەکانی پەیوەست بەم دۆخە پڕ مەترسیەوە.
وشکەساڵی لە ئەفریقیا 200 ملیۆن کەسی خستۆتە بەردەم مەترسی قاتی و قڕی و برسێتیەوە. وشکەساڵیەک بە درێژایی چەندین دەیەی رابردوو ئەفریقیا وێنەی بۆ خۆیەوە نەبینیوە.
پێشبینی دەکرێت بە هۆی درێژەکێشانی جەنگی ئۆکراین و بەربەستەکانی بەردەم هەناردەکردنی دانەوێڵەو وەستانی ئەم بەرهەمە، رۆژهەڵاتی و ناوەڕاست بە پلەی یەکەم و ئەفریقیا بە گشتی لە ئاییندەیەکی نزیکدا رووبەرووی کەم بوونی سەرچاوەکانی ئاوو خۆراک و لەولاشەوە وشکبوونی سەرچاوەکانی ئاوی ژێر زەوی ببنەوە.
پێشبینیەکان ئاماژەیان داوە بەو ڕاستیەی قاتی و قڕی و برسیەتی و نەبوونی ژیان و گوزەران و ئاوی خواردنەوە لە داهاتوودا تەنگ بە دانیشتوانی ئەفریقیاو رۆژهەڵاتی ناوەڕاستەور هەڵبچنێ و کۆمەڵگا لەرزۆکە ناسەقامگیرەکانی پڕ لە نادادی ئەم وڵاتانە رووبەرووی پشێوی و ئاڵۆزی و ئەگەرەکانی ڕاپەڕین و کاولکاری و داڕمان بکاتەوە.
کەچی لای ئێمە نە بایەو نە بۆران….
وەڵام بدەوه