زمان ئامرازێکە بۆ پەیوەندیکردنی بە دونیای دەرەوەمان. ئامرازێکە بۆ ئاڵوگۆڕی زانیاری و پەی بردن بە نهێنی و فەزای دەرەوەو ناوەخۆی کایەی پڕ پێچ و پەناو تەژی ڕەمزورازی ژیان.
گرنگیدان بە هونەر بە درێژایی تەمەنی مرۆڤ و بڕینی قۆناغەکانی هۆشیاری و گەشەی کۆمەڵایەتی و دروست بوونی تێگەیشتنی نوێ و پەرەسەندنە جڤاکیەکان، لە هەموو سەردەمێکدا وەک ئامرازێکی ناساندنی نەتەوەو نمایشی ماهیەتی دابونەریت و شوناسی نەتەوایەتی، بەشێکی دانەبڕاو بووە لە هۆشیاریەکەی.
ساڵانێکە بە هۆی دۆخی تایبەتی هەرێمی کوردستان و قەیرانە یەک لە دوایەکەکان و تەوژمی ئاڵنگاریە ئابوریەکانەوە، دامەزراوە هونەری و حکومی و ئەهلیەکان نەیانتوانیوە وەک باقی کەرتەکانی تر، گرینگیدان بە هونەر بخەنە بەرنامەی کارەوە.
هونەری شانۆ و نواندن و بەرهەمە سینەماییەکان و گەڕانەوە بۆ شوناسی ڕەسەن و بەهێزکردنی لایەنە هونەریەکانی رووبەری ژیان و لە سەرووشیانەوە سینەماو شانۆ، ساڵانێکە دوچاری پاشاگەردانی و دواکەوتن و قەتیس مانێکی کوشندە بووە.
گرینگیدان بە هونەری سینەماو شانۆ دەتوانێ لایەنە جوانەکانی جڤاک و هونەری ڕەسەنی کوردەواری لە مۆسیقاو گۆرانی کلاسیکەوە بگرە تا دەگات بە بوارەکانی تری هونەر بخاتە نمایشەوە.
بەم پێیە ئەم گرنگیدانە ئەشێ جۆرێک لە جوڵەو چالاکی بخاتەوە نێو دونیای خەواڵووی هونەرەوە و چیتر هەموو بوارو جوانیە شاراوەکانی نەتەوەیەکی مەزلومی وەک کورد، نەکرێن بە قوربانی ئابوری و فەرامۆش کردنی ئەم دیوە جوانەی رووبەری کایەی ژیانەوە.
وەڵام بدەوه