مەسرور بارزانی جارێکی دیکە جیهانی ئاگادار کردەوە کە دەبێ کار و فشارەکانیان بە ئاراستەی چارەسەرکردنی کێشەکان بێت نەوەک دوابخرێن.
لە کۆڕبەندی ئاشتی و ئاسایش، ڕێزدار مەسرور بارزانی سەرۆکی حکومەتی هەرێمی کوردستان بە شێوە و ناوەڕۆکێکی سەرنج ڕاکێش و کاریگەری، شەڕی ئیسڕائیل و حەماس و کێشەی فەلەستین و پرسی دامەزراندنی دوو دەوڵەتی، بە پرسی نەتەوەیی و نیشتیمانی گەلی کوردستان بەستەوە، هەروەها بە کێشە هەڵپەسێردراوەکانی نێوان هەولێر و بەغدا، لە وەڵامی پرسیارەکاندا، جەنابیان هەوڵیدا سەرنجی جیهان بۆ ئەوە ڕابکێشێ کە بەبێ چارەسەرکردنی پرسی میللەتان بە تایبەتیش پرسی کورد و فەلەستین، ڕۆژهەڵاتی ناوەڕاستێکی سەقامگیر و گەشەکردوو نایێتە دی، بەبێ ئەوەش جیهان ناتوانێ ئاسایشی هەبێت و دڵنیایی ئایندەیەکی باشتر بە دانیشتوانەکانی بدات.
سەرۆک وەزیران مەسرور بارزانی ئەو ڕاستیە مێژوویەی وەبیر ئامادەبووان و خەڵک هێنایەوە، کە پرسی کورد وەک نەتەوە و کوردستان وەک نیشتیمان لە باشووری کوردستان، هێشتا بە چارەسەر نەکراوی ماوەتەوە، هۆکارەکەی درێژبوونەوەی هەمان ئەو عەقڵیەتە زاڵەیە کە لە دامەزراندنی دەوڵەتی عێڕاقەوە هەیە، لە دوای بیست ساڵ لە ڕووخانی ڕژێمی دیکتاتۆری و دروست بوونی عێڕاقی نوێ و چەسپاندنی ژمارەیەک لە مافەکانی گەلی کوردستان لە دەستووری هەمیشەیی عێڕاق دا، بەڵام نە ڕێز لە دەستوورەکە دەگیرێ و نە کاری پێدەکرێت، تەنها ئەو ماددە و بڕگانە نەبێت کە لە بەرژەوەندی پێکهاتەیەک دایە، کە هەوڵی خۆسەپاندن و دووبارە کردنەوەی هەمان ئەزموون و مێژووی سەردەمی دیکتاتۆری دەدات، کە ئەمەشیان بەلای خەڵکی کوردستانەوە هەرگیز جێگای قبوڵ کردن نیە.
حسیبە سعید گەردی
۲۱ـی دێسەمبەری ۲۰۲۳
وەڵام بدەوه