جەنگی ئۆکراینا دەرخەری حەقیقەتێکی مێژوویی و سەلمێنەری ڕاستیەکی حاشاهەڵنەگرە.
ئەو خۆراگری و گیانی بەرخودانەی گەلی ئۆکراینا لە میانەی بەرگری کردنی سەرسەختانەیان لە خاکو نیشتیمانی خۆیان نواندیان، حاڵەتێکی دەگمەنە لە مێژووی شەڕو پێکدادانە سەربازیەکان لە ئاستی جیهاندا.
بەرخودان و خۆراگری گەلی ئۆکراینا لەم جەنگەدا بێ وێنەیە.
گەلی ئۆکراینا بۆ مانەوەیان وەک نەتەوەو پارێزگاری کردن لە خاکی نیشتیمانیان لەپاڵ سەربازو جەنگاوەرانی سوپادا مانەوەیان هەڵبژارد و وڵاتی خۆیان نەکرد بە نێچیرێکی ئاسان بۆ رووسەکان و داگیرکاری زلهێزی جیهانیان رەت کردەوە.
گیانی بەرخودان و رۆحیەتی بەرز و ورەی پۆڵایینی بەرەنگاربوونەوەی ئۆکراینەکان هەم سوپای زەبەلاحی رووسیەی تووشی شۆک و سەرسوڕمان کرد، هەم ئەم حەقیقەتەشی سەلماند:
هەر نەتەوەیەک بۆ مانەوەی خۆی بە مانای تەواوی نەتەوە بەرگری لە نیشتیمان و زێدو بابوباپیرانی خۆی نەکات، هیچ دەوڵەت و لایەنێکی نێودەوڵەتی ئامادە نیە شەڕی بۆ بکات و سینگی خۆی بکاتە قەڵغان و بەڵاگێڕەوەی و قوربانی بۆ بدات.
حەقە ئێمەی کوردی چەوسێنراوی دەستی بێگانەو تورکوفارس و عەرەبی شۆفینی بەدڵێکی فراوانەوە پەند لەو جەنگەی ئۆکراینا وەرگرین و ئەم ڕاستیەمان لەبەر چاو بێت تەنیا خۆمانین دەتوانین بە یەکڕیزی و دەست لە ناودەست و دوور لە پەرتەوازەیی و هزری ناوچەگەرێتی و بە پشتگیری و پشتیوانیکردن لە یەکتر، هەوڵی پاراستن و سەرخستنی هەرێمی کوردستان و تێپەڕاندنی تەنگژەو قەیرانەکان بدەین و ئامادەی هەرجۆرە قوربانیەک بین لە پێناو پارێزگاری کردن لە شکۆی نەتەوە و نیشتیمانمانەوە.
وەڵام بدەوه