زکری موسا : عەلی باپیر ڕاست دەكات هەرێم هی ئەو نیە

عەلی باپیری سەرۆكی كۆمەڵ ئەمڕۆ ڕاگەیێندراوێكی بوغزاوی پڕ لە كینی بڵاو كردۆتەوە و ئازادیخوازی و عەداڵەتخوازی بە خەڵك دەفرۆشێتەوە.
1. ڕوونترین وشەی ناو ڕاگەیێندراوەكە وشەی هەرێمەكەتانە. بەڵێ زمان درۆ ناكات. مامۆستا! خۆی بە خەڵكی هەرێم نازانێ و وەك بڵێی خەڵكی شوێنێكی تر بێت و وەك كەسێك دەڕوانێتە هەرێم كە نە پەرۆشیی هەرێمە و نەش بڕوای بە دۆزە باڵاكانی ئەم هەرێمە هەیە. سایكۆلۆژیای وشەی هەرێمەكەتان بەڕوونی پێشان دەدات كە ئەم زاتە ڕقی لە خەڵكی هەرێمە. هۆكارەكەشی ئەوەیە كە گەلی كوردستان  وەڵامی موزایەدات و نیفاقی ئەم جۆرانەیان داوەتەوە و دەنگیان پێ نەدا. حزبەكەی عەلی باپیر لە هەڵبژاردنی ڕابردوو تەنیا یەك كورسی هێنا و هەمووشمان چاك دەزانین كێ بوو دەنگی بۆ كورسیەكەی كۆمەڵ كۆ دەكردەوە.
2. زمانی ڕاگەیێندراوەكە تا بڵێی لە ئاستێكی نزم دایە. ئەمە زمانی سیاسی و عاقل و موسڵح و چاكەخوازان نیە. زمانی شەڕ و تەنگپێهەڵچنین و وروژاندن و بێ باكیە. ئەگەر عەلی باپیر بڕوای بە قەزیەی كۆمەڵگە و پەروەردە با و خەمی وڵاتی هەبا هەرگیز ڕێگەی بەخۆی نەدەدا بەم زمانە بێتە ئاخڤتن.
3. خەڵكی كوردستان زۆر چاك بەرهەم و هەڵێنجراوی ژوورە تاریكەكانی فكر و ئایدیۆلۆژیا و گومڕایی و نیفاق و داعشپەروەری دەناسنەوە. بیریشیان دێت میدیای عەلی باپیرلە كاتی شەڕی داعشدا چۆنچۆنی شەڕی دەروونی لەگەڵ هێزی پێشمەرگە دەكرد. ئێستاشی لەگەڵ بێ عەلی باپیر و مەدرەسەكەی بە بەها باڵاكانی گەلی كوردستان تەنگاو و نامۆن. كار بۆ شتێك دەكەن كە لە بنەڕەتدا پەیوەندی بە گەلی كوردستانەوە نیە و خزمەتی جۆرەكانی داگیركاری دەكەن.
4. مێژوویەكی زۆر دوور نیە، خەڵكی كوردستان ڕەفتار و كردەوەكانی گرووپ و تاقمە توندڕۆكانی بیر ماوەتەوە جەنابی مامۆستا. چیی خەراپە دەرهەق ئازادی و ئافرەت و گەنج و كۆمەڵگە و پێكەوەژیان و پەیامی مرۆڤسالارانەی ئایینەكان كردووتانە. ئاوەڕێك لە مێژووی خۆت بدەوە و سەیری ئاوێنە بكە تێدەگەی كە خەڵك ناحەقیان نییە هەمیشە بە گومانەوە لە ئێوە بڕوانن.
5. نەك تەنیا خەڵكی كوردستان لێتان ڕازی نین بەڵكو كەوادیرانی كۆمەڵیش ڕۆژانە لەدەست ناعەدالەتی و ئۆلیگارشی و خۆبەزلزانین و تەماحی بنەماڵەیی ئێوە لەناو حزبەكەتان گلەییان هەیە. 
6. ڕیفراندۆم دەنگی ڕەوا و حەقی گەلێكی ستەمدیدە بوو و، قوربانیی نیفاقی ئێوە و ناپاكانە. ئەوەی گاڵتە بە دەنگی ڕەوا و دلێری میلەتەكەی دەكات چۆن دەتوانێ بەناوی خەمخۆری میلەت قسە بكە.
7. بە تەئكید هەرێمەكەمان پێویستی بە ئیسلاح و چاكەخوازی و پێداچوونەوە و باشتربوونە. بەڵام بە دڵنیاییشەوە پێویستی بە نیفاق و داعشباوەری و بیری توندڕۆیی نیە.