داگیرکاری بۆ گەلانی داگیر کراو هەمیشە فاکتەرێکی پاڵنەرە بۆ کۆڵنەدان و خۆڕادەست نەکردن و درێژەدان.
درێژەدان بە خۆراگری بەرامبەر هێزێکی داگیرکار و بەرامبەر بە تەوژمێکی وێرانکارەوە.
هێزی داگیرکار تەوژمێک نیە تەنیا بە ئاراستەی داگیرکردنی خاک و جوغرافیاوە دڵی ئاو بخواتەوەو سنوور بۆ زێدەڕۆییەکانی دابنێ. هیچ هێزێکی داگیرکار نادۆزیتەوە هەڵگری مەیل و خواستێکی شەیتانی وێرانکردن و کاولکاری نەبێت.
تەوژمە داگیرکەرەکان لە ناخی خۆیاندا سیخناخن بە هەستێکی ڕقاویەوە و بە قین لە دڵ گرتنەوە پەلامار دەدەن و مەیلی ژێر دەستەکردن و دەستەمۆکردن لە ناخیاندا پەنگ دەخواتەوەو هیچ سنوورێکی ئەخلاقی و عورف و نەریتێکی ئینسانی ناناسن.
ئەوەی بەلای ئەم جۆرە هێزانەوە گرینگە و لە لوتکەی حەزوئارەزووەکانیاندا چەکەرەدەکات، نەک تەنیا داگیرکردنی خاک و نیشتیمان و جوغرافیایە، بەڵکو دەست بەسەراگرتنی روح و ئینتیماو فکرو هەست و نەستی لایەنی بەرامبەر و توانەوەیەتی لە نێو بۆتەی جیهانبینی هێزی داگیرکارو لە قاڵبدانیەتی بۆ دەست خستنی ئامانجێکی بە پیرۆزکراوەوە.
هەوڵدانی هێزی داگیرکار سەپاندنی تەسکبینی و تاکڕەوی و تاک بریاریە، لە رێگەی بڵاوکردنەوەی ترس و تۆقاندن و زەبروزەنگ و راوەدوونانەوە.
ئەو فاکتەرەی لای هێزەداگیرکراوەکە گەرەکە بە زیندوویی بمێنێتەوە و لە گشت بارودۆخێکدا ئامادەیی هەبێ، ئەو توانا شاراوەیەو دینامیکیەتی بەرخودان و بەگژداچوونەوەی ستەمی داگیرکاری و ئەو ناحەقیەیە بەرامبەری پێرەودەکرێ.
ئامادەیی ئەم دینامیکیەتە شاراوەیە گەرەنتی و سەرمایەو هێزێکی لەبن نەهاتووی مەعنەویە بۆ بەرپەرچ دانەوەی هێزی شوومی داگیرکار و بەزاندنی بکەرە ناوەکیە ستەمکارەکانی ناویەوەو ئازاد کردنی جوغرافیاو روح و جەستە لە تەوق و زنجیری ستەمکاری و چەوساندنەوەو دواجار شکست پێ هێنانی سیاسیەتی قێزەوەنی داگیرکاری و دەست بەسەراگرتنی رقاویەوە.
وەڵام بدەوه