مۆساد هۆشداری توند بە تورکیا دەدات

ماڵپەڕی یۆرۆنیوز ئاشكرای دەكات چوار رۆژ بەر لە هێرشەكەی ئیسرائیل بۆ سەر بنكە توركییەكەی سووریا، سەرۆكی مۆساد پێوەندی بە ئەسعەد شەیبانی وەزیری دەرەوەی سووریا كردووە و لە گەشەكردنی رۆڵی سەربازی توركیا لەسەر خاكی سووریا ئاگاداری كردووەتەوە.
ئەمڕۆ هەینی 21ی ئاب ماڵپەڕی یۆرۆنیوز بە پشتبەستن بە سەرچاوە ئیسرائیلییەكان ئاشكرای دەكات، چوار رۆژ بەر لە هێرشەكەی ئیسرائیل بۆ سەر بنكەی هێزی ئاسمانی ئەبوزهوور لە ئیدلبی باكوری رۆژئاوای سووریا، رۆمان گۆڤمان سەرۆكی مۆساد پێوەندی بە ئەسعەد شەیبانی كردووە و لە گەشەكردنی رۆڵی سەربازی توركیا لەسەر خاكی سووریا ئاگاداری كردووەتەوە.
یۆرۆنیوز باسی لەوە كردووە، بەگوێرەی لێكدانەوەی میدیای ئیسرائیلی توركیا بە دووفاقی هەڵسوكەوت دەكات، لەلایەك خۆی وەك هاوپەیمانی وڵاتانی رۆژئاوا دەردەخات چونكە ئەندامی ناتۆیە كەچی لە هەمان كاتدا ئیسرائیل بە دوژمنێكی ستراتیجی دەزانێت.
ماڵپەڕە ئەوروپییەكە ئاماژە بۆ ئەوەیش دەكات بوونی سەربازگە و راداری توركی لە سووریا بەلای ئیسرائیلەوە قبووڵكراو نییە، چونكە بە كۆسپی دەزانێت بۆ ئۆپراسیۆنەكانی لەپێناو پاراستنی تەناهییەكەی.