سوپای ئیسرائیل بەردەوامە لە پێشڕەوی

ئەمڕۆ چوارشەممە (25ی كانوونی یەكەمی 2024)، تەلەڤزیۆنی سووریا ڕایگەیاند، لە دەوروبەری شارۆچکەی سووەیسە لە ناوچەی قونەیترە، لە باشووری ڕۆژئاوای وڵات، سوپای ئیسرائیل دەستی بە پێشڕەوی زیاتر كرد.
سەرچاوەکان ڕوونیان کردووەتەوە، “بلدۆزەر و ئامێرە سەربازییەکانی ئیسرائیل چوونەتە ناوچەی بەنداوی مەنتەرە لە پارێزگای قونەیترە، هەروەها هێزەکان خاڵی سەربازییان دامەزراندووە و بەربەستی خۆڵیان لە دەوروبەری بەنداوەکە دروست کردووە”.
هاوكات ڕوانه‌گه‌ى سووری بۆ مافەکانی مرۆڤ ڕایانگەیاند، “ئیسرائیل بە قووڵایی نزیکەی 7 کیلۆمەتر لە ناوچە دابڕاوەکەوە پێشڕەویی کردووە، هەروەها دانیشتوانی گوندەکانی ئوم ئەلعیزام و عەدنانییەیان ئاگادار کردووەتەوە، ده‌بێت ته‌نها لە کاتی دیاریکراو هاتوچۆ بكەن”.
جێی باسە، دوای ڕووخانی ڕژێمی ئەسەد لە سووریا، هێزەکانی ئیسرائیل چوونەتە ناوچە چەک لێداماڵراوەکان، کە دوای شەڕی ساڵی 1973 لەناو خاکی سووریادا دامەزرابوون و ئه‌و ناوچانه‌یان كۆنتڕۆڵیان كرد.
ئەگەرچی ئیسرائیل ئەم پێشڕەوییە وەک ڕێکارێکی کاتی وەسف دەکات بۆ دڵنیابوون لە ئاسایشی سنوورەکانی، بەڵام وەزیری بەرگریی ئیسرائیل ڕایگەیاند، کە هێزەکانی ئیسرائیل لانیکەم به‌ درێژایی ماوەی وەرزی زستان لەسەر چیای شێخ (جبل الشیخ) دەمێننەوە. چاودێرانی سیاسییش پێیانوایه‌ ئیسرائیل بچێتە شوێنێك گەڕانەوەی زۆر ئەستەم دەبێت