با ئەم کۆنگرەیە نەوعی بێت
زیاتر لە دوازدە ساڵ بەسەر دوا کۆنگرەی پارتی دیموکراتی کوردستاندا تێپەڕیوە.
لەوەتەی پارتی دامەزراوە دەیان قۆناغی سەرکەوتن و نشوست و هەورازو نشێوی سەختی خەباتی چەکداری و سیاسی و دیپلۆماسی بڕیوە. رووبەرووی دۆسیەو پلانی دوژمنان و نەیاران و کەرت بوون و پەرت بوون بۆتەوە. بەڵام دواتر توانیویەتی بە ئیرادەو هێزی لە بن نەهاتووی تازەوە، رێکخستنەکانی رێک بخاتەوەو پتەوتر و شێلگێرانەتر لە جاران بێتەوە کۆڕی خەباتی سیاسی و بەهێزەوە دەربکەوێت.
لە سەرووبەندی گرێدانی کۆنگرەی حزب و دوای تێپەڕبوونی دوازدە ساڵ بە سەر دوا کۆنگرەوە، گرینگە هەڵبژاردنی سەرکردایەتی تازە لە سەر بنەمای توانا و لێوەشاوەیی و شیاوبوون بێت.
ئەندامانی سەرکردایەتی گەرەکە توانای بەهێزکردنی رێکخستنەکانی حزب و یارمەتیدانی حکومەت و دامودەزگا فەرمیەکانیان و زیاتر نزیک بوونەوە لە بنکە جەماوەریەکانیان هەبێ و خۆیان لە جەماوەر جیا نەکەنەوە.
سەرکردایەتی نوێ پێویستە خوێنی تازە بکاتەوە ناو شادەمارەکانی حزب و هێزو تواناو توانستی تازەی پێ ببەخشن و دیواری نیوان خۆیان و جەماوەر برووخێنن و هیوا بۆ کۆمەڵگا بگێڕنەوەو ببن بە جێگەی متمانەو بڕوای جەماوەر و خۆیان و حزب نەخەنە دۆخی پاشاگەردانی و چەقین و نائومێدیدا.
وەڵام بدەوه