وادەی کۆتاییهاتنی ئەم گەرمایە راگەیاندرا

کەشناسیی هەرێمی کوردستان، ئەمڕۆ دووشەممە لە راگەیێندراوێکدا بڵاوی کردەوە، ئەمڕۆ جگە لە دەڤەری گەرمیان، لە ناوچەکانی دیکەی باشووری کوردستان پلەی گەرما یەک بۆ دوو پلەی سیلیزی دادەبەزێ و سبەی "نزیک دەبێتەوە" لە تۆمارکراوەکانی ئەمڕۆ.
دکتۆر لوقمان موفتی، شارەزای کەشناسی، راگەیاند "لەگەڵ کۆتاییهاتنی ئەم مانگە، پێشبینی دەکرێ پلەی گەرما نزیکەی پێنج پلەی سیلیزی دابەزێ و پێناچێت گەرمای وەک ئێستا لەم وەرزەدا دووبارە ببێتەوە. 
ئەو شارەزایەی کەشناسی پێشبینی دەکات: "لەم چەند رۆژەدا بای رۆژئاوا چالاک بێت و ئەگەر هەیە بەو هۆیەوە کەمێک تۆز دروست بێت. لەگەڵ دابەزینی پلەی گەرما لە کۆتایی ئەم مانگە، پێشبینی دەکرێ تۆز و خۆڵەکەش زیاتر بکات".
شاڵاو هیدایەت، شارەزایەکی دیکەی کەشناسیی راگەیاند "بەرزبوونەوەی پلەی گەرمای ئەم چەند رۆژە کاتییە و لە سبەیەوە جگە لە بەشێکی گەرمیان، لە ناوچەکانی دیکە پلەی گەرما بە رێژەی جیاواز دادەبەزێ".
شاڵاو هیدایەت پێشبینی کرد: "لە کۆتایی ئەم مانگەوە بەهۆی کاریگەری بارستە هەوایەکی فێنک بۆ سەرجەم ناوچەکانمان پلەی گەرما بە رێژەی بەرچاو دابەزێ لە سەرجەم ناوچەکان. پێشبینیمان وایە چی دیکە بەرزبوونەوەی گەرمای بەتین روونەداتەوە، چونکە لە کۆتایی مانگ بەولاوە نزمەپەستانی گەرمی وەرزیی زەریای هیندی قۆناخ بە قۆناخ لەسەر ناوچەکانمان دەکشێتەوە، کە هۆکارێکی سەرەکییە بۆ شەپۆلەکانی گەرمای هاوین".