خاوەنی کۆڕەک تیلیکۆم لەسەر بڕیارەکەی بەغدا هاتە دەنگ

سیروان بارزانی، خاوەنی کۆمپانیای کۆڕەک تیلیکۆم، تایبەت  راگەیاند: بڕیارەکانی کۆمیسیۆنی گەیاندن و پەیوەندییەکانی عێراق دژی کۆڕەک تیلیکۆم، نایاسایی و بێبنەمان و بەشێکن لە شەڕێکی ئابووری، سیاسی و ئەمنی دژی هەرێمی کوردستان.
ئەمڕۆ چوارشەممە، 19ـی ئابی 2026، خاوەنی کۆمپانیای کۆڕەک تیلیکۆم,  ئاشکرای کرد، بڕیارەکانی کۆمیسیۆن زۆر بە روونی لایەنگیریی رکابەرەکانی کۆڕەک دەکەن و ریکلامیان بۆ دەکەن، جەختیشی کردەوە کە لایەنێکی سیاسی کۆمیسیۆنەکەی قۆرخ کردووە و تاوەکو ئێستاش هۆکاری راستەقینەی ئەم کارە نادادپەروەرانەیە زانراو نییە.
سیروان بارزانی دووپاتی کردەوە، بە هیچ شێوەیەک سەرۆکی کۆمیسیۆن مافی دەرکردنی بڕیاری وەها ناڕەوا و نایاسایی نییە و رێکارەکانیان دوورن لە هەموو بنەمایەکی یاسایی.
لە بەشێکی دیکەی لێدوانەکەیدا، خاوەنی کۆمپانیای کۆڕەک تیلیکۆم داوای لە حکوومەتی عێراق و سەرۆکی دەسەڵاتی دادوەریی عێراق کرد، رێگری لەم جۆرە کردەوە نابەرپرسانەی بڕیاردەرانی کۆمیسیۆن بگرن، هۆشداریشی دا کە هەڵسوکەوتی ئەم جۆرە بەرپرسانە دەبێتە هۆی ئەوەی عێراق لەسەر ئاستی جیهان وەک وڵاتێکی بێیاسا دەربکەوێت