دكتۆر باخان ئازاد، ئه‌و پزیشكه‌ی به هۆی ئاشكراكردنی گه‌نده‌ڵییه‌وه، له لایه‌ن ئاسایشی سلێمانییه‌وه ده‌ستگیركرابوو، دوای ئازادبوونی، رایگه‌یاند، هه‌ڕه‌شه‌ی كوشتنیان لێكردووه و په‌یامیشیان بۆ ناردووه، سلێمانی به‌جێبهێڵێت. ئه‌و پزیشكه داوای له سه‌رۆكی حكومه‌تی هه‌رێمی كوردستان و وه‌زاره‌تی ته‌ندرووستی و داد و ده‌سته‌ی ده‌ستپاكی و په‌رله‌مان كرد، لێكۆڵینه‌وه له دۆسیه‌كانی گه‌نده‌ڵی ته‌ندرووستی هه‌ڵه‌بجه بكه‌ن، كه به هۆی ئه‌وه‌ی داهاتێكی زۆری لێ به فیڕۆ ده‌درێت و چوار مه‌رزی به‌سه‌ره‌وه‌یه، به‌رده‌وام ململانێ له‌سه‌ر پۆسته‌كه‌ی هه‌یه و باندێك ده‌ستیان به‌سه‌ر كه‌رتی ته‌ندرووستی شاره‌كه‌دا گرتووه و له كۆی 140 ملیۆن دینار داهاتی نه‌شته‌رگه‌ریی نه‌خۆشخانه‌كان ته‌نیا 10 ملیۆن دیناری بۆ حكومه‌ت ده‌گه‌ڕێننه‌وه.
له میانی به‌شداریكردنی له گه‌شتی هه‌واڵی كوردستان24، شه‌وی پێنجشه‌ممه (3ی حوزه‌یران/ یۆنیۆی 2021)، د. باخان ئازاد، پزیشك له ته‌ندرووستی هه‌ڵه‌بجه گوتی: له دنیادا، كاتێك كه‌سێك ده‌یه‌وێت خزمه‌ت بكات به نه‌خۆش و گه‌نده‌ڵییه‌ك ئاشكرا بكات، سوپاس و پێزانینی پێ ده‌وترێت و حكومه‌ت پشتیوانی ده‌كات بۆ ئه‌وه‌ی نموونه‌یان زیاتر بێت.
گوتیشی: تێبینم كردووه، ئه‌و گه‌نده‌ڵیانه‌ی هه‌ن له هه‌ڵه‌بجه به‌م جۆره بوون، له هه‌ڵه‌بجه ئه‌و ده‌رمانانه‌ی ده‌درا به نه‌خۆش كۆن بوون و ده‌رمان هه‌بوو هی 2003 بوو. زۆربه‌ی هه‌ره زۆری ده‌رمانه‌كان مێژوویان له‌سه‌ر لابرابوو، ده‌یانوت مشك خواردوویه‌تی، وه‌ك ئه‌وه‌ی مشكه‌كه ته‌نیا مێژووی سه‌ر ده‌رمانه‌كان بخوات. كه‌چی به من ده‌ڵێن نازانێت كه‌لوپه‌لی پزیشكی و ده‌رمان له‌یه‌ك جیابكاته‌وه، له كاتێكدا من پزیشكم.
هه‌روه‌ها گوتی: تێبینم كردووه، له ماوه‌ی شه‌ش مانگدا 12 ته‌ن ده‌رمان كراوه‌ته ژێر خاكه‌وه. له كاتێكدا بۆ هه‌ڵه‌بجه كڕاوه نه‌ك بۆ چین، باندێك ده‌رمان ده‌كڕن، ده‌چن ئه‌و ده‌رمانانه ده‌كڕن كه 10 رۆژی ماوه به‌سه‌ر بچێت. خه‌ڵكی هه‌ڵه‌بجه كیمیاییباران كراوه، شایسته‌ی رێزه نه‌ك ئه‌وه‌ی ده‌رمانی به‌سه‌رچووی بدرێتێ.
باسی له‌وه‌شكرد، په‌یمانگه‌یه‌كی گه‌شتوگوزاری ته‌واوكردووه، به‌ڕێوبه‌ری له‌دایكبوونه، پلیت بڕ كراوه‌ته به‌ڕێوبه‌ری نه‌خۆشخانه، كه‌سی وا هه‌یه به‌ڕێوبه‌ری دوو شوێنه و هه‌یانه دوو جار له حكومی چووه‌ته‌وه زانكۆ و هاوكات به‌ڕێوبه‌ری ئێوارانیشه. هه‌یه له مانگێكدا 5 مووچه وه‌رده‌گرێت و هه‌شه ناتوانرێت وه‌ك پێویست به داهاتی ناوخۆ مووچه‌ی پێ بدرێت.
ئاشكراشیكرد، له نه‌خۆشخانه‌ی عه‌نه‌ب، سێ دكتۆری به‌نج هه‌یه له هه‌ڵه‌بجه، له نه‌خۆشخانه‌ی گشتیی هه‌ڵه‌بجه، له نه‌خۆشخانه‌ی كۆرۆنا و نه‌خۆشخانه‌ی له‌دایكبوون، ناویان نووسراوه، كه‌چی ده‌وامیان نه‌ده‌كرد، كه‌سێكی یاریده‌ده‌ر به‌نجی ده‌دا به خه‌ڵك، به ته‌له‌فۆن ده‌یپرسی چه‌ندی تێ بكه‌م، جگه له وه‌زیفه‌ی خۆیان له سلێمانیش له نه‌خۆشخانه‌یه‌كی ئه‌هلی بوون، ئه‌مه كاره‌ساته.
د. باخان ئاماژه‌ی به‌وه‌شدا، به‌رپرسانی شاره‌كه‌ی ئاگادار كردووه‌ته‌وه و گوتی: به ته‌حه‌دداوه ده‌یڵێم، پارێزگاری هه‌ڵه‌بجه، به‌ڕێوبه‌ری ته‌ندرووستی، ئاسایشی هه‌ڵه‌بجه‌م ئاگادار كردووه‌ته‌وه. داواكاری گشتییم ئاگادار كردووه‌ته‌وه. دۆسیه‌م نووسیوه له دادگا وه‌ك هه‌واڵده‌رێك، وه‌ك خه‌مخۆرێك، ئه‌گه‌ر نا ته‌نیا تووشی سه‌رئێشه بوومه، ئه‌وه‌ی پێم سه‌یر بوو، بێده‌نگییه. كه‌رتی ته‌ندرووستی كه‌وتووه‌ته ده‌ست كۆمه‌ڵێك كه‌سه‌وه، كه له حكومه‌ته‌وه ده‌یكێشنه‌وه به ناوی نه‌خۆش و هه‌میش له نه‌خۆشی ده‌كێشنه‌وه. له سه‌رده‌می كۆرۆنا 240 ملیۆن و 170 ملیۆن و 500 ملیۆن دینار له لایه‌ن سه‌رۆكی حكومه‌ته‌وه بۆیان دابین كراوه، هاوسه‌رۆكی یه‌كێتی پاره‌ی بۆ ناردوون، ئاسۆی حاجی محه‌مه‌د بامۆكی و ده‌وڵه‌مه‌نده‌كانی ناوچه‌كه پاره‌یان بۆ ناردوون، نه‌خۆشخانه‌یان بۆ درووست كردووه، مووچه‌یان بۆ دابین كردوون، كه‌چی كۆمه‌ڵێك كه‌س هه‌بووه، له مانگێكدا 6 تا 7 ملیۆن دیناری وه‌رگرتووه، بۆ سێ شه‌و، ئاخر ماقوڵه پزیشكێك له مانگی چوار و پێنج و شه‌ش بایكۆتی كردبێت و ده‌وامی نه‌كردووه، پشتگیری مووچه‌شیان بۆ كردوون، هاتوونه‌ته‌وه له كه‌رته حكومییه‌كه شه‌وی به وه‌ره‌قه‌یه‌ك یان به سه‌د هه‌زار دینار ده‌وامیان كردووه، له نه‌خۆشخانه‌ی كیمیاییباران و وه‌فا ناویان هه‌یه.
د. باخان له باره‌ی پشتیوانه‌كانی ئه‌و كه‌سانه، گوتی: ئه‌وانه پشتیوانی حزبیان هه‌یه، له كوێی دنیا هه‌یه پزیشكێك به‌ریت و لای كه‌سانێك به‌ندی بكه‌یت، كه به مادده‌ی رفاندن و به‌كارهێنانی مادده‌ی هۆشبه‌ر و ساخته‌كاری راگیراون. له كاتێكدا من به نووسراو و به به‌ڵگه گه‌نده‌ڵیم ئاشكرا كردووه.
سه‌رۆكی حكومه‌ت خۆی داوای كردووه لێكۆڵینه‌وه له خه‌رجكردنی بودجه‌ی كۆرۆنا بكرێت. بڕۆن سه‌یر بكه‌ن، بزانن ئه‌وانه خه‌ریكی چی بوون. شتێك بایی 5 هه‌زار بووه، 100 هه‌زاریان نووسیوه، شتێك بایی 40 هه‌زار بووه، 800 هه‌زاریان نووسیوه، قه‌ره‌وێڵه‌یه‌ك بایی 60 دۆلاره، ئه‌مان 330 هه‌زاریان له‌سه‌ر نووسیوه، ئه‌و وه‌سڵانه‌ی كاتێك خۆیان شت ده‌كڕن، وه‌سڵه‌كه به به‌تاڵی وه‌رده‌گرن و خۆیان پڕی ده‌كه‌نه‌وه.
ئه‌و دكتۆره روونیكرده‌وه، كه ئێستا مه‌ترسی له‌سه‌ر ژیانی ئەو هه‌یه و گوتی: ده‌بوایه هێزه ئه‌منییه‌كانی سلێمانی پشتیوانی منیان كردبا، چونكه من ده‌ڵێم دزی هه‌یه له 140 ملیۆن دیناری نه‌شته‌رگه‌ری ته‌نیا 10 ملیۆنیان گه‌ڕاندووه‌ته‌وه بۆ حكومه‌ت و 130 ملیۆنیان دزیوه، چۆن هه‌ست به ئاسایش و ئارامی بكه‌م، كارمه‌ندێكی ئاسایش بێت و چه‌ك له رووم رابگرێت.
داواشیكرد، ئه‌نجوومه‌نی ئاسایشی هه‌رێمی كوردستان پارێزگاری له ژیانی بكات.
گوتیشی: به مادده‌ی 2ی یاسای خراپ به‌كارهێنانی مۆبایل ده‌ستگیركراووم، كه‌ی ئه‌و یاسایه په‌یوه‌ندی به ئاسایشه‌وه هه‌یه.
له باره‌ی ئه‌وه‌ی سكاڵا تۆمار بكات، گوتی: به دڵنیاییه‌وه وه‌زاره‌تی داد ئاگادار ده‌كه‌مه‌وه و ده‌چمه دادگا و سكاڵا تۆمار ده‌كه‌م، له چ یاسایه‌كدا هه‌یه، كه‌سێك ساڵێك نییه بووه‌ته پزیشك، ئیقامه ته‌واو نه‌كات و راسته‌وخۆ له موقیمی بكرێته موقیمی پێشكه‌وتوو، له كوێی دنیا هه‌یه كه‌سێك بەبێ خزمه‌ت پله‌ی ئیداری گه‌وره وه‌ربگرێت.
داواشی له وه‌زیری ته‌ندرووستی و سه‌رۆكی حكومه‌تی هه‌رێمی كوردستان كرد، بێنه سه‌ر هێڵ.
ئه‌مڕۆش به خوشكه‌كه‌ی منیان وتووه، با د. باخان سلێمانی به‌جێبهێڵێت.
ئه‌و دكتۆره ئاشكراشیكرد، ئه‌و شه‌ڕه‌ی هه‌یه له‌سه‌ر ته‌ندرووستی هه‌ڵه‌بجه هۆكاره‌كه‌ی ئه‌وه‌یه چوار مه‌رزی له‌سه‌ره. مه‌رزی په‌روێزخان، هه‌رچه‌ند سه‌ر به كه‌لاره، ته‌ندرووستییه‌كه‌ی سه‌ر به هه‌ڵه‌بجه‌یه، مه‌رزی باشماخ و شوشمێ و پشته‌شی هه‌یه. له كاتی كه‌ره‌نتینه‌كه‌دا، ئه‌و خواردنه به‌سه‌رچووه‌ی ده‌ستیان به‌سه‌ردا ده‌گرت، ده‌یانفرۆشته‌وه به نه‌خۆش. له كاتی كۆرۆنا سیتی سكانیان كرده 40 هه‌زار دینار و فریاكه‌وتن، كه دیاری سه‌رۆكی حكومه‌ت بوو، كردیان به پلیت بڕین. به كڕینی دوو سێ ئامێر، پاره‌كه‌یان شارده‌وه. ته‌نیا به ناوی كۆمپانیای خواردنه‌وه، مانگی بایی 15 ملیۆن دینار پاككه‌ره‌وه نووسراوه، كه ده‌توانی تا عه‌ربه‌تی پێ بشۆی، ئه‌وانه‌ی باڵاده‌ستن، هه‌ر یه‌كی دوو سێ كه‌سی بۆ خۆی نووسیوه، به‌ڕێوبه‌ره‌كه هه‌شت كرێكاری وه‌همی بۆ خۆی نووسیوه. كرێكاری كردووه به سكرتێری حكومی و كرێكاری بردووه له راوێژكاری ئه‌هلی ئێواران مووچه‌ی بۆ بڕیوه‌ته‌وه و شوفێری خۆی كردووه به كارمه‌ندی راوێژكاری ئێواران.
له به‌شێكی دیكه‌ی قسه‌كانیدا، د. باخان گوتی: رۆژی پێنجشه‌ممه (3ی حوزه‌یران/ یۆنیۆی 2021) به دوو ژماره هه‌ڕه‌شه‌یان لێكردووم، سه‌رۆكی حكومه‌تیش پێویسته له هه‌ڕه‌شه‌ی ئه‌و لات پاڵه‌وانانه بێده‌نگ نه‌بێت و پێویسته لیژنه‌ی ته‌ندرووستی و ده‌سته‌ی ده‌ستپاكی و وه‌زاره‌تی ته‌ندرووستی بێنه سه‌ر خه‌ت و لێكۆڵینه‌وه بكه‌ن.
پێویسته هه‌موومان یه‌كده‌نگ بین، بۆ ئه‌وه‌ی ئه‌م حكومه‌ته بتوانێت داهاتی ناوخۆ به یه‌كسانی كۆبكاته‌وه و ئه‌و كۆمه‌ڵه چه‌ته و مافیاگه‌رییه‌ی ده‌ستیان گرتووه به‌سه‌ر فه‌رمانگه‌كاندا بوه‌ستێنرێن. له ناو فه‌رمانگه‌ی ته‌نفیزی سلێمانی 300 ده‌فته‌ریان دزی كه سه‌ر به وه‌زاره‌تی داده و ئه‌مه یه‌كه‌مجار نییه، ئه‌و گه‌نده‌ڵیانه باس ده‌كرێن.
وەڵام بدەوه