دکتۆرە باخان ئازاد کە بەوە ناسراوە باس لە هەبوونی گەندەڵی لە کەرتی تەندروستیی هەڵەبجەدا دەکات و چەندین جار لە میدیاکانەوە ئەو پرسەی ورووژاندووە و لە دادگایش سکاڵای لەسەر تۆمار کردووە، بەهۆی قسەکانیەوە لەلایەن ئاسایشی سلێمانییەوە زیاتر لە دوو رۆژ دەستگیر دەکرێت و دواتر ئازادی دەکەن.
چیرۆکی دەستگیرکردنی دکتۆرە باخان ئازاد، پزیشکی گشتی لە نەخۆشخانەی گشتیی هەڵەبجە:
رۆژی 2021/05/31 چووم بەدوای کوڕەکەمدا لە قوتابخانە بیهێنمەوە، لە فولکە سەوزەکەی سەروو مزگەوتی قازی محەممەد [لە سلێمانی] وەستابووم. کەسێک لە ناوەڕاستی شەقامەکەدا تەلەفۆنی دەکرد، هەر ئەوەندەم زانی بە شەق و جنێوی سووک و بە راکێشانی چەک کەوتە پەلاماردانی ئۆتۆمبێلەکەم و ئاماژەی بەوە کرد ئەگەر دەرگاکەی بۆ نەکەمەوە بە چەک تەقەم لێ دەکات. منیش نە دەرگام کردەوە نە جام. حەزیشم دەکرد هەر لەوێدا بیکوشتمایە.
چ پێویست دەکات لە کاتی شۆفێریکردن لە ناوەڕاستی فولکەیەکدا هەڵبکوتیتە سەر من و بە زەبری چەک بتەوێت بمگریت؟ پاشان کۆمەڵیک ئاسایشیان هێنا، بە شەش-حەوت پیاو لە میکزەمینییەکدا چواردەوری منیان گرت.
ئەوانە بە فەرمی لەلایەن کەسێکی ناو ئاسایشەوە نێردرابوون. لە کاتێکدا بابەتەکە بابەتی ئاسایش نییە کە ئەوان بۆی هاتوون. ئەوان بە ماددەی 2ی مۆبایل کە سەر بە دادگای لێکۆڵینەوەیە و دەیانەوێت بە ناوی خراپ بەکارهێنانی سۆشیال میدیا پزیشکێک بگرن.
بردمیانە ئاسایش، گوتم: "من جلەکانم جلی ماڵەوەیە. هیچ نەبێت، دەبێت جلێک لە بەر بکەم کە بگونجێت." دوایی پەلاماری ماڵمانیان دا و مۆبایلی دایکمیان برد. ئەمانە هیچی فەرمانی دادوەری نەبووە.
یەکێک لەو کەسانە لەلایەن کەسێکی تایبەتەوە بە ناوی "س." کە لە سلێمانی بەرپرسی ئۆپەراسیۆنەکانە، پەیوەندیی خزمایەتی و کۆمەڵایەتییان هەیە، ئەم کەسەی لە ئاسایشی سلێمانی وەکو هەڕەشەیەک بەکارهێناوە، چونکە پێشتر لە مانگی شوباتدا دوو رۆژ پێش دەستلەکارکێشانەوەی وەستا حەسەن منیان بۆ ئاسایشی سلێمانی بانگ کرد، لەوێ بەڵێننامەیەکیان پێ پڕکردمەوە و گوتیان: "دەبێت بە هیچ جۆرێک باسی گەندەڵییەکانی کەرتی تەندروستیی هەڵەبجە نەکەیت."
ئەوە بوو لە رۆژی 2021/05/31ـدا بەسەر من و ماڵەوەمانیان دا کە ماڵەکەمانیان هەموو تێکدا بەسەر یەکدا. رۆژی دوای ئەوە دادوەر بە کەفالەتی 500 هەزار دینار ئازادی کردم، بەڵام ئەوان حسابیان بۆ فەرمانی دادوەر نەکرد و زیاتر لە دوو رۆژ لەوێ منیان هێشتەوە.
دکتۆرە باخان ئازاد گوتی: "دەبوو ئاسایش بەرگری لە من و خەڵکی بەشمەینەت بکات نەک لە پشتی کۆمەڵێک دز و گەندەڵەوە کە داهاتی وڵاتەکەی من و نەخۆشی هەڵەبجە بە هەدەر دەدەن و بە چەندین شێواز گەندەڵی دەکەن. ئامێرێک کە بە هەزار دۆلارە، کەچی پێنج هەزار و 500 دۆلاریان لەسەر حکومەت نووسیوە. ئامێرێک کە لە بازاڕدا نرخێکی دیاریکراوی هەیە، ئەگەر بایی پێنج هەزار دینار بێت، ئەوان 100 هەزاریان نووسیوە. بە 15 هەزار دیانر بووبێت، 800 هەزار دیناریان نووسیوە. دەبوو ئاسایش لە پشت ئێمەومانانەوە بووایە و پارێزگاریی لە ژیانمان بکردایە کە داوای گەڕانەوەی مافی نەخۆش و خەڵک دەکەین."
لەبارەی ئەوەی کە ئاخۆ سکاڵای تۆمار کردووە، ئەو پزیشکە دەڵێت: "پێشتر سکاڵام تۆمار کردووە. هەر مانگی شوبات کە بۆ ئاسایشی سلێمانی بانگ کرام، رۆژی دواتر نووسراوم بۆ دەستەی دەستپاکی، گوڵباخ خان، برد و خستوومەتە ناو دۆسیەکەمەوە و گوتوومە: 'ئەم کەسانەی لای خوارەوە بەرپرسن لە هەر شتێک کە بەسەر ماڵ و منداڵمدا بێت.' هەر هەفتەی رابردوویش سکاڵای خۆم لای داواکاری گشتیی سلێمانییەوە بەرز کردووەتەوە. بەڵام هەست دەکەم بەدواداچوون و لێکۆڵینەوەکان لاوازن. پێشتریش لە هەڵەبجە ئەم سکاڵایە نووسرابوو، بەڵام بە هەند وەرنەگیرا. بۆیە داواکارم وەزارەتی داد و سەرۆکی حکومەتی هەرێمی کوردستان لیژنەیەکی ئەمنی بۆ سەیرکردنی کامێراکان پێکبهێنێن بۆ ئەوەی وەک کەیسی ئامانج بابانی کامێراکان نەسڕنەوە."
دکتۆرە باخان ئازاد گوتی: "من بە دادوەرم گوت: 'من پزیشکم، فەرمانبەری حکومەتم و کەسێکی هەڵهاتوو نیم. بە چ حوکمێک کەسێک کە پزیشکە و خزمەت دەکات، دەیبەیت لە لای کەسی هۆگری ماددەی هۆشبەر و لەشفرۆش و تاوانبار دایدەنێیت؟ حەوت منداڵ و 15 ئافرەت لە ژوورێکدا کە شەش بە 10 مەترە. لە هیچ شوێنێکی دنیادا نییە کەسێک دادوەر ئازادی بکات، بەڵام بیهێڵیتەوە. لە هیچ شوێنێکی دنیادا نییە بڵێیت 'خۆم دەکوژم،' ئینجا بەرتبدەن."
ئەو پزیشکە گوتیشی: "لە وڵاتێکدا کە باسی دیکتاتۆریەتی سەدام و هیتلەر و ئەوانە دەکرێت، کاتێک هەڵسوکەوتی ئەمانە دەبینیت، شەرم لە خۆمان دەکەین. دایکم چەندین قوربانیی داوە و سێ شەهیدی هەیە. ئەمە وەفایانە بۆ منداڵی شەهیدێک، دەبێت چی لە منداڵی داعشێک بکەن کە لە سکی دایکیدا هاتووەتە دەرەوە و هیچ تاوانێکی نییە؟"
رۆژی سێشەممە 27ی نیسانی 2021، وەزارەتی تەندروستیی حکومەتی هەرێمی کوردستان لیژنەیەکی سێ کەسی بۆ بەدواداچوونی قسەکانی دکتۆر باخان ئازاد پێکهێنا کە تۆمەتی گەندەڵیی دایە پاڵ کەرتی تەندروستیی هەڵەبجە و نەخۆشخانەی گشتیی شارەکە و رایگەیاند، سەرجەم بەڵگەکانی گەیاندووەتە دەستەی دەستپاکی و داواکاری گشتی.
وەڵام بدەوه