تیمی پارێزەرانی بافڵ تاڵەبانی، سەرۆکی یەکێتیی نیشتمانیی کوردستان روونکردنەوەیەکیان بڵاوکردەوە و دەڵێن، دادگەی سلێمانی داوایەکی لاهوور جەنگیی رەتکردووەتەوە و دۆسیەکە لە بەرژەوەندیی بافڵ تاڵەبانی "بە یەکجاری" داخراوە.
لە روونكردنەوەکەی تیمی پارێزەرانی بافڵ تاڵەبانیدا هاتووە، "لە رۆژی 09-10-2022 دادگەی بەرایی سلێمانی بڕیاریدا بە رەتکردنەوەی داواکەی (لاهوور جەنگی بورهان) پاش ئەوەی بریکاری (بافڵ جەلال تاڵەبانی) لە داوا یاساییەکەدا ئاماژەی بۆ ئەوە كرد، تەواوی ئەو بڕیارانەی کە دراون، یاسایین و بەپێی پەیڕەوی یەکێتی ئەنجامدراون."
تیمی پارێزەرانی بافڵ تاڵەبانی ئاماژەی بەوەش کردووە، "[بافڵ تاڵەبانی] تەواوی بەڵگەکانی بۆ دادگە خستەڕوو و داوایکرد داواکەی رەتبکرێتەوە، چونکە بە پێی یاسای ئەحزاب دەبێت لە ماوەی 60 رۆژدا داوا تۆمار بکەن، بەڵام داواکار دوای تێپەڕبوونی ماوەیەکی زۆر داوای تۆمار کردووە."
لە نێوەڕاستی مانگی ئەیلوول، پارێزەرێکی لاهوور شێخ جەنگی بە تۆڕی میدیایی رووداوی راگەیاند، لاهوور شێخ جەنگی لە سکاڵاکەیدا "داوای کردووە پاڵپشت بە پەیڕەوی نێوخۆیی پەسندکراوی کۆنگرەی چواری یەکێتیی نیشتمانیی کوردستان کێشەی هاوسەرۆکان بە یاسایی چارەسەر بکرێت."
وەڵام بدەوه