شارەزایەکی بواری کەشناسی چەند زانیارییەکی گرنگ لەبارەی وەرزی بارانبارینی 2022 - 2023 ئاشکرا دەکات و دەڵێت زستانی داهاتوو ئەگەری ھاتنی رێژەیەکی زیاتر لە شەپۆلە بەھێزەکانی سەرما و بەفر بارین هەیە بەراورد بە زۆرێک لەساڵانی رابردوو.
ئاراس جەبار شارەزای بواری کەشناسی لە راپۆرتێکدا سەبارەت بە وەرزی بارانبارینی 2022 - 2023 بڵاویکردووەتەوە: "سەرەتا ئەو دیاردانەی کاریگەرییان ھەیە لەسەر کەشوھەوای ناوچەکانمان ھەر لەسوڕی گەرمبوون و ساردبوونەوەی بەشە جیاوازەکانی زەریا و دەریاکان ھۆکارێکی گرنگن بۆ دیاریکردن و پێشبینیکردنی وەرزی و دوورمەودا لەوانەش زەریای ھێمن کە ماوەی دوو ساڵ زیاترە لانینا لە رۆژھەڵات ناوەراستی زەریاکە بەردەوامی ھەیە تا کۆتایی ئەمساڵیش سوڕی سێیەمی بە لاوازی بەردەوامی دەبێت و لە وەرزی زستان و بەھاردا بەرەو گەرمبوونەوە دەچێت، زەریای ھیندیش کە ئێستا ئاوەکانی رۆژئاوای ساردترن لە مامناوەند ئەمەش ھۆکارێکی دیکەی کەمی شێ و کەمبارانی ئەم دوو ساڵە بووە لە ناوچەکەدا بەھەمان شێوە لەگەڵ دیاردەی ENSOی زەریای ھێمن لە وەرزی زستان و بەھاردا پێشبینی دەکرێت ئاسایی ببێتەوە".
دەشڵێت: "ئەنجامەکە بەم شێوەیە کە وەرزی پاییزمان بارانی کەمتر دەبێت لە ئاسایی، بەڵام باشتر دەبێت لە پاییزی دوو ساڵی رابردوو ھەم لەرووی باران و لەرووی پلەی گەرمییەوە ساردتر دەبێت، هەروەها وەرزی زستان و بەھارمان بەرادەیەکی زۆر باش شێدار و باراناوی دەبێتەوە کە کۆتایی بە وشکە ساڵی بھێنێت، لەڕووی پلەی گەرمییەوە بەھەمان شێوە ساردتر دەبێت، لە وەرزی زستانیشدا ئەگەری ھاتنی رێژەیەکی زیاتر لە شەپۆلە بەھێزەکانی سەرما و بەفر بارینمان دەبێت بەراورد بە زۆرێک لەساڵانی رابردوو".
هەروەها ئاشکراشی دەکات: "دەنگۆی ھاوشێوە بوونی کەشی ئەمساڵ وەک دوو ساڵی ڕابردوو ھیچ بنەمایەکی نییە و زۆربەی ئەو ھۆکارانە گۆرانکارییان بەسەردا ھاتووە کە لە دوو ساڵی رابردوو ھۆکارێکبوون بۆ وشکە ساڵیی و بەرزی پلەکانی گەرم".
وەڵام بدەوه