بە بڕیارێکی نوێ، زەویی جووتیارانی کورد لە کەرکووک دەکەوێتەوە بەر مەترسی

بەڕێوەبەرایەتیی کشتوکاڵی کەرکووک داوا لەو جووتیارانە دەکات کە گرێبەستی کشتوکاڵییان هەیە گرێبەستەکانیان نوێ بکەنەوە، ئەمەش پێچەوانەیە لەگەڵ بڕیارێکی پێشووتری هادی عامری، سەرۆکی لیژنەی ماددەی 140، چونکە ئەمجارە گرێبەستی زەوییە کێشەلەسەرەکانیش لەنێوان جووتیارانی کورد و عەرەبی هاوردە دەگرێتەوە.
زوهێر عەلی، بەڕێوەبەری کشتوکاڵی کەرکووک  رایگەیاند، ئەو بڕیارە تەنیا ئەو زەوییانە ناگرێتەوە کە کێشەلەسەرن و بەپێی یاسای 35ـی ساڵی 1983 گرێبەستیان بۆ کراوە، "بەڵکوو ئەو زەوییانەش دەگرێتەوە کە سەر بە بەڕێوەبەرایەتیی کشتوکاڵ و وەزارەتەکانی دیکەن و بە گرێبەست دراونەتە جووتیاران". 
بەپێی زانیارییەکان، داوا لەو جووتیارە عەرەبانەش کراوە کە بە گرێبەست زەویی جووتیارانی کوردیان پێدراوە، لە ماوەی 15 رۆژدا گرێبەستەکانیان نوێ بکەنەوە.
ساتع کەرکووکی، جووتیارێکی کوردی گوندی تۆپزاوەیە داوا لە بەرپرسانی کورد و ئەندامانی پەرلەمان دەکات ئەو بڕیارەی کشتوکاڵی کەرکووک رابگرن، ئەگەرنا بە جێبەجێکردنی ئەو بڕیارە جارێکی دیکە کێشە بۆ جووتیارانی کورد دروست دەبێتەوە.
ئەو بڕیارەی کشتوکاڵی کەرکووک لەکاتێکدایە، کە پێشتر لە رۆژی 18-06-2023 هادی عامری، سەرۆکی دەستەی باڵای لیژنەی ماددەی 140ـی دەستوور، بڕیاری 29ـی کارا کردەوە و ئاگاداری بەڕێوبەرایەتیی كشتوكاڵی كەركووک و دادگەی کەرکووکی كردەوە کە نابێت ئەو گرێبەستانەی کە بەپێی بڕیارەکانی (لجنە شؤون الشمال) کراون، نوێ بكرێنەوە.