ئێستە سەرنجی ئەمەریكا بە تەواوەتی لەسەر عێراقە و هەوڵی داڕشتنەوەی سیاسەت و هاوسەنگیی هێز لە عێراق لە رێگەی ستراتیجیەتێكی نوێ دەدات بە كەمكردنەوەی دەسەڵات و هەژموونی ئێران و سەپاندنی سزا بەسەر ژمارەیەك كەسایەتی دیاری سیاسی و ئیداری و لاوازكردنی دەسەڵاتی میلیشیاكانی سەر بە تاران.
ئەو هەنگاوەی ئەمەریكا لە چوارچێوەی پلانێكی درێژخایەنە بۆ لێكهەڵوەشانەوەی دەوڵەتی قووڵ و گەڕاندنەوەی هاوسەنگی بۆ پێوەندییەكانی عێراق لە ناوچەكە، ئەوەش لە بەرانبەر بوونی جموجۆڵی ئێرانی دژ بەوە بۆ پاراستنی دەسەڵاتی خۆی و رێكخستنەوەی میلیشیا و ئامرازەكانی لە عێراق، بۆیە ئەگەری هەیە گۆڕەپانی عێراق دەچێتە ناو قۆناغی كێبەركێ و ململانێیەكی سەخت لە نێوان واشنتن و تاران، كە هەڵبژاردنی داهاتووی پەرلەمانی عێراق یەكلای دەكاتەوە.
چەند سەركردەیەكی سیاسیی عێراق كە ئاگەداری گفتوگۆكانن لەگەڵ ئەمەریكا ئاماژە دەكەن، ستراتیجیەتی نوێی ئەمەریكا لێدانی دەوڵەتی قووڵە لە عێراق كە ئێران لە ناو پرۆسەی سیاسی لەو وڵاتە پشتی پێ دەبەستێت، ئەویش لە رێگەی سەپاندنی سزاكان بەسەر ژمارەیەك بەرپرسی عێراقی بە پلەی وەزیر و بەڕێوەبەری گشتی لە وەزارەتەكان و دوورخستنەوەی كاریگەرییان لە بڕیارەكانی حكوومەتی عێراق.
واشنتن پێی وایە ئەو رێوشوێنانە رێگە بۆ گەڕاندنەوەی دەسەڵاتی ئێران لە عێراق بۆ پێش 2012 خۆش دەكەن، لە رێگەی هێنانەپێشەوەی هێزی نوێی سیاسی كراوە بە رووی رۆژئاوا بتوانن رووبەوڕووی دەسەڵاتی ئێران ببنەوە و رۆڵی میلیشیاكان لاواز بكەن، ئەوەش پشت بە ئەنجامی هەڵبژاردنی داهاتووی پەرلەمانی عێراق دەبەستێت.
بۆیە دامەزراندنی مارك ساڤایا وەك نێردراوی تایبەت لە لایەن دۆناڵد ترەمپ سەرۆكی ئەمەریكا، كۆتاهێنانە بە رۆڵی میلیشیاكان و وەستانی دەسەڵاتی ئێرانە لە رێگەی داخستنی نووسینگە ئابوورییەكانی سەر بە سوپای پاسداران لە بەغدا و بەهێزكردنی دەسەڵاتی ئابووری و سیاسی و تەناهیی ئەمەریكا لە عێراق، بۆیە ئێستە ئەمەریكا كار لەسەر لێكهەڵوەشانەوەی چوارچێوەی هاوئاهەنگی دەكات لە رێگەی دوورخستنەوەی ئەو هێزانەی بە پاساوی نزیكیان لە ئێران كە وەك تیرۆریست پۆلێن كراون.
وەڵام بدەوه