لە دوای 2003ەوە تا ئێستە عێراق هیچ جۆرە گۆڕانكارییەكی ئەوتۆی بەخۆیەوە نەبینیوە، سەرچاوەی هەموو گۆڕانكارییەكان یان دەسەڵاتە و یان ئەو بەرنامەی دەسەڵات كاری پێ دەكات، كەچی لە عێراق هەر هەمان كەسایەتی و هێزە سیاسییەكان فەرمانڕەوان و هەر هەمان سیاسەتیش پێڕەو دەكەن، كە لەسەر بنەمای گەندەڵی و خراپیی ئیدارەدان و دڵسۆزی و لاگیری بۆ دەرەوە بنیات نراوە، توێژەرێكی سیاسی پێی وایە لە چوارچێوەی گۆڕانكارییەكانی ناوچەكە، ئەگەری كودەتایەكی سیاسی لە عێراق هەیە.
بە شایەتی هەمووان ناوچەكە، واتە رۆژهەڵاتی ناوەڕاست گۆڕانكاریی گەورەی سیاسی و ئابووری بەخۆیەوە دەبینێت، لەو ناوەدا عێراقی لێیان بەدەر نییە و ئەگەر هەیە گۆڕانكارییەكە ئەویش بگرێتەوە و قۆناغێكی نوێی سیاسی لە مێژووی ئەو وڵاتە سەر هەڵبدات، بەتایبەتی لەی سایەی پیربوونی دەستەبژێری سیاسی لەو وڵاتەدا كە ناتوانێت خۆی لەگەڵ خواستەكانی ناوخۆیی و دەرەكیی قۆناغەكەدا بگونجێنێت.
نەبیل عەزاوی توێژەری سیاسی وریایی لە ئەگەری دروستبوونی كودەتایەكی سیاسی لە عێراق دەدات، ئەوەش لە سایەی ئەو پەرەسەندنە خێرایەی لە ناوچەكە هەیە، كە بە رووخانی رژێمی بەشار ئەسەد لە سووریا و لاوازبوونی دەسەڵاتی ئێران و میلیشیاكانی دەستی پێ كرد و ئێستە بە ناڕەزایەتیی جەماوەری لە توركیا درێژەی هەیە.
روونی كردەوە، هێزە سیاسییەكانی عێراق گەیشتوونەتە قۆناغی پیربوون و پێویستە لە فەلسەفەی سەرەتا و كۆتایی تێبگەن، چونكە مەعقوول نییە تا بێكۆتا لە دەسەڵات بەردەوام بن، لەوكاتەی گۆڕانكارییەكانی ناوچەكە پێویست بە رەوتی كار و بەرنامەیەكی جیاواز و داناتر بۆ ئیدارەدانی تەنگژەكان دەكات.
ئەو توێژەرە ئاماژە دەكات كە 70%ی دەنگدەران لە هەڵبژاردنی داهاتوو بێدەنگ و خۆڵەمێشی و بایكۆتكارن، ئەوانە گرەویان لەسەر دەكرێت بۆ گۆڕانكارییەكی ریشەیی لە هاوسەنگی هێز لە عێراق، بۆیە ئەگەر ئەوان بڕیار بدەن دیواری بێدەنگی بشكێنن و بەشداری لە هەڵبژاردن بكەن، دەتوانن چینی كۆنی سیاسی لابدەن و هاوكێشەیەكی نوێی فەرمانڕەوایەتی دروست بكەن، گۆڕانكارییەكەش ناوخۆیی دەبێت نەك بە ویستی دەرەوە، بۆیە هەڵبژاردنی داهاتووی عێراق یەكلاكەرەوەیە و پێویستە هێزە سیاسییەكان لە مەترسیداریی ئەو راستییە تێبگەن.
وەڵام بدەوه